NAPUHAG sa mga sakop sa Philippine Drug Enforcement Agency (PDEA) Leyte ang usa ka drug den sa Dakbayan sa Tacloban.
Ang operasyon gilunsad alas 6:50 sa gabii sa Mayo 6, sa BL44, L4, Habitat Village, Sto. Nino, Tacloban.
Nasikop ang magtiayon nga tag-iya sa maong drug den ug lakip na ang tulo ka bisita niini.
Giila sa PDEA ang magtiayon nga nasikop nga sila si Victorio, 36, ug Elena Dela Rosa, 26.
Lakip sa nasikop ang mga bisita nga sila si Rosalina Quiroso, 34; Kristine Adonis 23, ug Melody Cinco, 20.
Matod sa PDEA, nakadawat sila og report bahin sa maong drug den human na obserbaran nga bisan kinsa lang mosulod niini.
Gipaubos sa surveillance ang maong drug den ug nakompirmar sa PDEA ang report nga ilang nadawat.
Wa na makapalag ang magtiayon ug mga bisita niini sa dihang naktuhan sila sa mga operatiba sa PDEA.
Nasakmit sa operasyon ang mga pakete sa gituhoang shabu nga nitimbang og 11 gramos ug dunay kantidad nga P74,800.
Naa na sa kustodiya sa PDEA ang mga dinakpan ug gipasakaan og kasong kalapasan sa Republic Act 9165. / JKDP