Moabot sa 2,000 ka mga benepisyaryo sa mga barangay sa isla sa Olango ang nakadawat og financial assistance sa Department of Social Welfare and Development (DSWD) 7.
Si Kongresista Paz Radaza sa Lapu-Lapu City maoy naningkamot nga mahatag kini nga ayuda sa mga apektadong residente pinaagi sa programang Assistance to Individual in Crisis Situation (AICS) sa DSWD.
Gipaniguro ni Radaza nga adunay igong pundo sa nasudnong budget alang sa implementasyon niini sa dakbayan.
Ang mga benepisyaryo nga nakadawat sa ayuda nga tag P1,500 mao ang mga taga Barangay Talima, San Vicente, Baring, Tingo, Sabang ug Santa Rosa kinsa nakadawat niadtong Mayo 5.
Ang mga benepisyaryo mga shell craft maker, boatmen, island hopping tourist guide ug mananagat.
Sila maoy gikonsiderar nga grabeng naapektohan sa pandemya sumala sa kongresista.
“Daghan ang nawagtangan og panginabuhian labi na kining mga tour guide sa Island hopping nga wala gyuy turista karon nga mosuroy mao nga wala gyud ni silay income sama sauna,” matod ni Radaza.
Mipasalig ang kongresista nga mopahigayon og mga pagpang-apud-apod og financial assistance sa mainland sa Dakbayan sa Lapu-Lapu sa mosunod mga adlaw alang niadtong mga apektado niining panahon sa pandemya.
Gikatakdang moabot sa 20,000 ka mga benepisyaryo ang makapahimulos unya niini diin matag usa makadawat og tag P1,500 nga cash gikan sa DSWD. / GCM