2 gipusil-patay sa Mandaue city

Duha patay human sa duha ka managlahing kaso sa pagpamusil sa Dakbayan sa Mandaue niadtong Huwebes, Mayo 6, 2021.

Patay ang usa ka habal-habal drayber human naigo sa nasaag nga bala samtang natulog siya sa iyang panimalay alas 2:30 sa kaadlawon sa Sitio Lalin, Barangay Jagobiao, Mandaue City.

Giila ang biktima nga si Fernando Derain Nernesada, 39, lalaki, ug molupyo sa lugar.

Matod ni PMaj. Marvin Fegarido, ang hepe sa Basak Police Station, nga niadto ang usa ka Marycel Estremos sa ilang estasyon ug nipahibawo nga si Nernesada napusilan sa wala mailhing armadong tawo.

Sigon ni Fegarido nga base sa imbestigasyon sa mga lumolupyo sa lugar nakakita og duha ka nagmotorsiklo nga miagi sa ilang lugar ug adunay kalit nga nibuto dayon nisibat ang usa ka motorsiklo diin nagagikan ang pagbuto sa pusil.

Matod ni Fegarido nga dili si Nernesada ang tuyo sa mga armadong tawo ug napagan lang.

Sigon ni Fegarido nga naigo sa wala nga bahin sa iyang ulo si Nernesada.

Gidala si Nernesada sa Eversley Childs Sanitarium and General Hospital diin gideklarar nga dead-on-arrival sa ospital nianang alas 3:10 sa kaadlawon.

Pipila ka oras ang nilabay, nakadawat sab og taho ang kapulisan sa Canduman Police Station nga usa ka negosyante gipusil-patay atubangan sa iyang panimalay sa Zone 5,

Barangay Canduman, Mandaue City sa alas 12:40 sa udto sa Mayo 6.

Giila ang biktima nga si Rodulfo Bihag, 81, minyo ug molupyo sa maong lugar.

Matod ni PLtCol. Mercy Villaro ang tigpamaba sa Mandaue City Police Office (MCPO), nga bag-o lang naabot si Bihag sa iyang balay gikan nag-park sa iyang sakyanan.

Base sa mga imbestigasyon nga adunay nagmotorsiklo ug ang sakay niini kalit nga nipusil ni Bihag. Si Bihag namatay dihadiha. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph