Di monimos 100 ka mga drayber sa tradisyonal nga public utility jeepneys (TPUJ) ang gipaubos sa seminar sa miaging mga adlaw aron maisyohan sila og balik pasada identification card (ID).
Ang Cebu City Jeepney Task Force (CCJTF) nga gipangulohan ni City Councilor James Cuenco isip chairman maoy nagpasiugda sa maong kalihukan aron mahatagan og panginabuhian ang maong mga drivers taliwa niining pandemya dala sa coronavirus disease 2019 (Covid-19).
Si Cuenco nitug-an nga gi-refer ni Mayor Edgardo Labella ngadto sa Emergency Operation Center (EOC) para sa ilang rekomendasyon sa hangyo sa buhatan ni Cuenco nga ablihan na ang tanang rota sa PUJ sa Dakbayan sa Sugbo aron dili na maglisod og sakay ang mga pasahero labi na sa peak hours.
Sa kasamtangan, ang Cebu City adunay 532 ka TPUJ nga maoy nagpasakay sa libuan ka mga pasahero matag-adlaw isip kaabag sa mga modernized jeepney sa siyudad.
Base sa listahan sa Balik Pasada Program sa Cebu City Government, adunay 1,739 ka mga drayber mga aplikante kinsa gustong mokuha og ID para sila makapamasahero sa higayon nga matugotan na ang ilang mga unit nga modagan.
Si Cuenco naghuwat nalang sa rekomendasyon sa EOC nga maoy basehan ni Labella sa iyang approval aron pabiyahian na og mga TPUJ ang mga lugar nga hangtod karon wala pay mga jeep de pasaheroan.
Matod ni Cuenco nga gikinahanglan ang dinaliang aksyon niini sanglit ang ubang mga bus nga kanhi nagbiyahian sa Cebu City gikataho nga nibalik na ang ilang orihinal nga biyahe paingon sa Lalawigan sa Sugbo. (PAC)