Nakigtabo si Philippine Charity Sweepstakes Office (PCSO) General Manager Royina Garma sa local chief executives sa mga siyudad ug probinsya sa Sugbo aron ipahibawo ang problema sa pagkatap sa ilegal nga small town lottery (STL) sa kabarangayan.
Matod niya, nalugi ang ilang ahensya sa gibanabana nga P12 milyones matag adlaw sa mga Siyudad sa Sugbo ug Mandaue.
Personal nga gipakigkitaan ni Garma ang mga mayor sa Sugbo aron hisgutan ang dakong problema sa STL.
Matod niya nga sa tibuok isla sa Sugbo duha lang ka dapit ang ilang gihatagan og permit nga maka-operate sa STL nga naa sa Probinsya sa Sugbo ug sa Dakbayan sa Lapu-lapu.
Nagpasabot kini nga ang mga STL nga gipangmuntar sa kabarangayan sa Dakbayan sa Sugbo ug Mandaue ilegal kini ug walay pagtugot gikan sa PCSO nga angayang aksyonan sa kapulisan.
Gibutyag ni Garma nga kaniadto adunay legal nga STL operator sa Mandaue apan sa dihang gipatas-an ang koleksiyon, wala na kini mo-renew sa kontrata apan nagpadayon kini sa pag-operate sa ilegal na nga paagi.
Tungod sa maong ilegal nga operation sa STL, nga kung kaniadto ang kita sa lotto outlet sa PCSO nga moabot sa usa ngadto sa tulo ka milyon ka pesos, karon P300,000 nalang, matod ni Garma.
“Dapat sa Mandaue wala na sanang nag-operate dyan except lotto. For Cebu City may short fall, ibig sabihin, may utang po yung dating authorized agent kaya na-terminate din po yan. Isa po yan sa mga STL na pinasara ni presidente nuon pong akoy bagong upo kase may mga utang,” pasabot Garma.
Giawhag niya karon ang kapulisan nga molusad og clearing operation niining illegal nga nag-operate sa STL tungod kay adunay laing kompanya nga ilang hatagan og permit nga magpadagan sa STL sa Mandaue ug dakbayan sa Sugbo.
Matod ni Garma, dako og papel niini ang mga mayor o nga mawagtang ang ilegal nga STL sanglit ang pundo nga makuha sa PCSO moadto sa panudlanan sa gobyerno ug aduna usab bahin niini ang matag lokal nga kagamhanan.
Nakigtagbo na usab si Garma sa hepe sa Police Regional Office (PRO) 7 Police Brigadier General Ronnie Montejo alang sa susamang katuyoan bahin sa ilegal nga STL. (AYB)