Usa ka negosyante og isda nakuhaan og dul-an sa tunga sa milyon ka pesos human gitulis sa pito ka mga armadong tawo sa Sitio Kabay-ot, Barangay Hilantagaan, Lungsod sa Sta. Fe, Isla sa Bantayan niadtong Huwebes, Mayo 6, alas 10:45 sa gabii.
Ang Hilantagan usa ka gamayng isla nga sakop sa Sta. Fe ug ang mga tulisan gikataho nga nagsakay og pumpboat sa ilang pag-abot sa dapit.
Si Danny Boy Carabio, dunay panagatan ug komprador og mga isda nakaangkon og bun-og human gibunalan ang ulo og armas sa mga tulisan.
Si Police Señor Master Sgt. Henry Asentista sa Sta. Fe Police Station nga nahinabi sa dySS Super Radyo ug Superbalita Cebu nagkanayon nga kalit lang naabot ang mga tulisan sa panimalay ni Carabio.
Ang asawa ni Carabio ug mga anak gipahapa samtang si Carabio gibunlot sa nga armadong tawo ug gibunalan ang ulo sa armas.
Gipatug-an kini kon asa ang kuwarta ug nakuha ang cash nga moabot og P465,000.
Ang nga tulisan gihulagway nga naka-bonnet ug nagsakay sa duha ka pumpboat sa ilang pagsibat.
Lakip sa gidala sa mga tulisan ang CCTV camera, CPU sa computer ingon man ang video footage.
“Brownout man gud maong ngitngit kaayo niadtong higayuna, wala sila makaklaro sa mga armadong tawo dihang naabot,”matod ni Asentista.
Atol ning pagsuwat, nagpadayon ang hot pursuit operation sa kapulisan sa Sta. Fe.
Samtang, si Sta. Fe Mayor Ithamar P. Espinosa niluwat og pamahayag sa website sa lungsod nga nagpdayag sa iyang kasubo sa maong nahitabo nga pagpanulis.
“As we know this, we are calling our police and we are ordering a hot pursuit operation to seize these backing these bad deeds. I’m so sad as a father in the town, but the people in our town never asked to commit this kind of theft and crime,” dugang sa mayor.
Napatik sa samang sa website nga mohatag og reward money ang mayor sa makatudlo ug hinungdan sa pagkasikop unya sa mga tulisan.