Ang pagsakmit sa titulo maoy anaa karon sa alimpatakan sa KCS Computer Specialists-Mandaue City sa dihang ilang ikasangka og balik ang MJAS Zenith-Talisay City sa Game Two sa Chooks-to-Go Pilipinas VisMin Super Cup-Visayas leg finals karong gabii, Sabado sa Alcantara Civic Center sa lungsod sa Alcantara, Cebu.
Sa Game One niadtong Biyernes, ang Cesafi MVP nga si Shaquille Imperial mipabuto og tres sa himatyong segundos nga maoy mipatay sa MJAS, 67-66, aron pagsakmit sa bintaha sa best-of-three series, 1-0.
Ang maong tres ni Imperial maoy nagluwas sa Mandaue kansang 11- puntos nga labaw nahilis sa fourth quarter.
Naglabaw ang KCS, 62-51, ang Talisay sa kalit lang milusad og 13-0 nga rally nga giduslitan sa duha ka sunodsunod nga tres ni Patrick Cabahug ug three-point play ni Shane Menina aron pagsakmit sa labaw, 66-64.
Sipyat man tuod sa iyang unang pag-itsa sa tres ug short jumper, apan ang iyang ikatulo nga diha sa tungatungang bahin sa three-point area maoy nagtuldok sa ilang kadaugan.
"It was his (Imperial) decision. The play was intended for Mendoza, pero walang bakanti. It was a good decision,' padayag ni KCS coach Mike Reyes.
Nahitabo ang bayanihong itsa ni Imperial human masipyat si Jhaymo Eguilos sa Talisay sa iyang duha ka free throws.
Nipatigbabaw si Dyll Roncal sa rebound og dali kining nakatawag og timeout.
Ubos sa ilang possesion, pipila ka higayon nasipyat sa ilang itsa ang KCS apan dali ra usab kining makabaw sa offensive rebound.
Human sa tres ni Imperial, ang MVP awardee nga si Jaymar Gimpayan sa Talisay maoy nakakuha sa bola sais segundos ang nahabilin sa duwa ug dali kining gipasa ngadto ni Paolo Hubalde kinsa naapikihan na usab sa iyang katapusang itsa.
Kadto maoy unang kapildihan nga naangkon sa Talisay human nila ma sweep ang elimination round, 10-0, nga maoy naghatag kanila sa otomatikong lingkuranan sa finals.
Dala ang kaligotgot, mosulod sa korte ang Talisay karong gabii nga mosuway pagbawos aron paghatod sa series ngadto sa Game 3, butang nga napanglantawan usab ni coach Reyes.
"Babawi yan, but we're always ready. Sa amin naman, we have to improve our offense. Kasi kanina (sa Game One), sa depensa kami nanalo. Ang sama talaga nang offense namin," matod ni Reyes.
Si Imperial nangulo sa KCS nga may 16 puntos, upat ka rebounds, duha ka assists ug usa ka steal.
Midugang si Mendoza og 15 puntos, 11 niini sa fourth quarter sa dihang ang mi-rally ang Talisay.
Sa pildirong Talisay, si Patrick Cabahug mitali og 12 puntos ug 11 usab ang naumol ni Menina.
Sugdan ang Game 2 sa alas 7 sa gabii.
KCS-Mandaue (67)—Imperial 16, Mendoza 16, Exciminiano 10, Bregondo 7, Sorela 6, Delator 4, Roncal 4, Tamsi 3, Castro 0, Soliva 0, Octobre 0, Nalos 0, Mercader 0, Bongaciso 0.
MJAS-Talisay (66)—Cabahug 12, Menina 11, Eguilos 8, Villafranca 8, Gimpayan 7, Hubalde 6, Moralde 3, Mojica 3, Santos 2, Casajeros 2, Acuña 2, Jamon 2, Alvarez 0. Quarterscores: 12-18, 27-32, 47-44, 67-66. (JBM)