GIATUBANG ni Kananga Leyte Mayor Matt Torres ang 15 ka mga kawani sa YI JIA Marketing nga nasunog niadtong Martes, Mayo 4, 2021.
Apil sa gikaatubang sa mayor ang taga Public Employment Service Office (Peso).
Usa sa gihisgutan sa ilang pag atubang ang paghatag og trabaho sa 15 ka mga trabahante diin gimandoan ni Torres ang taga Peso nga tabangan kini nga makompleto ang tanan nga rekisitos.
Matod ni Romeo ‘Naki’ Tonacao, public information officer sa lungsod, ilang nasayran nga P230.00 ngadto sa P270.00 ang adlaw sa mga trabahante.
“Naguol si Mayor Matt kay naa ta tunga tunga sa pandemiya unya naay 15 ka mga tawo ang nawad-an og trabaho,” matod ni Tonacao
Nihatag usab og inisyal nga tabang si Torres sa mga trabahante atol sa sunog ug sa Lunes, Mayo 10, 2021, sugdan na sa Peso ang pagproseso sa mga aplikante.
Karon, Mayo 9, mohatag na usab og tabang pinansyal ang mayor sa mga trabahante aron magamit nila sa ilang pamilya miyentras nag-apply pa sa trabaho.
Gipaabot pa karon sa mayor ang report sa Bureau of Fire Protection (BFP) sa lungsod kon unsa gyod ang rason sa pagkasunog sa tindahan ug atubangon usab ang tag-iya niini.
Nagsugod ang pagsilaob sa kayo sulod sa tindahan mga alas 5 sa buntag ug gideklara nga fire out alas 7 sa buntag sa samang adlaw.
Nagbilin kini og danyos nga P1,000,000 ug wala hinuon nakalas ug naangol sa maong sunog. (JKDP)