ANG Los Angeles Lakers kuyaw nga mahagbong sa playoffs ug masulod sa play-in human sila gipukan sa Portland Trail Blazers, 106-101 atol sa ilang duwa kagahapon, Mayo 8, 2021.
Si Damian Lillard nipaarak og 38 puntos aron pangulohan ang Blazers kinsa nisaka na karon sa number six seed dala ang 38-29 win-loss record samtang nahagsa sa 7th seed ang Lakers nga adunay 37-30 win-loss record para sa inilogay sa playoff spot sa Western Conference.
Si Anthony Davis nipabuto og 36 puntos ug 12 rebounds kinsa niduwa nga wala pa gihapon ang ilang superstar nga si Lebron James.
Ang defending champion nga Lakers napilde ka-walo sa ilang 10 ka duwa nga maoy hinungdan nga gikan sa 4th seed karon nahimutang na sila sa ika-7.
Ang Lakers ug Blazers pulos adunay 37-29 win-loss record sa wala pa sila nagduwa sanglit ang modaog maoy moangkon sa 6th seed.
Base sa bag-ong format sa NBA, ang top 6 teams sa West ug East maoy makasulod direkta sa playoffs samtang ang nahimutang sa 7th seed paingon sa 10th seed sila ang moduwa sa play-in.
Ang number 7 maoy mokontra sa 8 samtang ang 9 maoy mobangga sa 10.
Ang modaog sa 7 ug 8 maoy makakuha sa 7th seed samtang ang napilde maoy moduwa sa nakadaog sa 9 ug 10 ug ang winner maoy makaangkon sa 8th spot para sa playoffs.
Samtang ang nidaog ang Utah Jazz batok Denver Nuggets ,127-120 aron kuptan ang best record sa NBA, 49-18.
Si Bogdan Bogdanovic nipaarak og 48 puntos apan si Jordan Clarkson kinsa nihipos og 21 puntos maoy nipadaog sa Jazz human iyang napasulod ang duha ka sunodsunod nga tres sa kapin 2 minutos mga nahabilin sa oras sa fourth quarter.
Ang Phoenix Suns nga maoy nagsunod sa Jazz, adunay record nga 48-19 nidaog batok sa New York Knicks, 128-105 aron pahugtan ang second best record sa NBA.
Nidaog sab ang San Antonio Spurs batok Sacramento Kings 113-104, gipukan sa Dallas Mavericks ang Cleveland Cavaliers 110-90.
Gisunog sab sa Miami Heat ang Minnesota Timberwolves 121-112, gilat-an sa Charlotte Hornets ang Orlando Magic 122-112 ug gipalopalo sa Milwaukee Bucks ang Houston Rockets 141-133, gisungag sa Chicago Bulls ang Boston Celtics 121-99 samtang gipakahitan sa Philadelphia 76ers ang New Orleans Pelicans 109-107. (PAC)