MIPABUTO og tres sa himatyong segundos si Shaquille Imperial sa dihang gipakuratan sa KCS Computer Specialists-Mandaue City ang inilog nga MJAS Zenith-Talisay City, 67-66, sa Game Two sa Chooks-to-Go Pilipinas VisMin Super Cup-Visayas leg finals niadtong Biyernes sa gabii sa Alcantara Civic Center sa lungsod sa Alcantara, Cebu.
Sa kadaugan, ang KCS mosuway og labni sa kampiyonato sa Game Two sa series nga giduwa kagabii, Sabado.
Daw og sa nagsubay sa haruhay nga kadaugan ang KCS human sa tulo og tunga ka quarters sa dihang nakaposte kini og 11-puntos nga labaw, 62-51.
Ang pagpanginit ni Gryann Mendoza kinsa mipabuto og duha ka tres nga gisundan usab sa short jumper ni Mchole Solera maoy nag-inat sa bintaha sa Mandaue.
Apan sa kalit lang ang Talisay daw og sa nakakita og gamayng bangag nga ilang kalutsan nga milusad og 13-0 nga rally. Kini giduslitan sa duha ka sunodsunod nga itsa ni Patrick Cabahug gikan sa rainbow territory ug three-point play ni Shane Menina aron pagsakmit sa labaw, 66-64.
Dinhi daw mihulip ang kangiob sa agianan sa KCS. Pero sa wala damha nakaipsot kini nga ingon og sa nagsubay sa lanot.
Sipyat man tuod si Imperial sa iyang unang pag-itsa sa tres ug short jumper, apan ang ikatulo nga diha na manukad sa tungatungang bahin sa three-point area dmaoy nagtuldok sa ilang kadaugan.
“It was his (Imperial) decision. The play was intended for Mendoza, pero walang bakanti. It was a good decision," padayag ni KCS coach Mike Reyes.
Nahitabo ang bayanihong itsa ni Imperial human masipyat si Jhaymo Eguilos sa Talisay sa iyang duha ka free throws.
Nipatigbabaw si Dyll Roncal sa rebound og dali kining nakatawag og timeout.
Ubos sa ilang possesion, pipila ka higayon nasipyat sa ilang itsa ang KCS apan dali ra usab kining makabawos sa offensive rebound.
Human sa tres ni Imperial, ang MVP awardee nga si Jaymar Gimpayan sa Talisay, maoy nakakuha sa bola, sayis segundos ang nahabilin sa duwa ug dali kining gipasa ngadto ni Paolo Hubalde kinsa naapikihan na usab sa iyang katapusang itsa.
Kadto maoy unang kapildihan nga naangkon sa Talisay human nila ma sweep ang elimination round, 10-0, nga maoy naghatag kanila sa otomatikong lingkuranan sa finals.
Dala ang kaligotgot, mosulod sa korte ang Talisay sa Game Two (kagabii) nga mosuway pagbawos aron paghatod sa series ngadto sa Game 3, butang nga napanglantawan usab ni coach Reyes.
“Babawi yan, but we’re always ready. Sa amin naman, we have to improve our offense. Kasi kanina (sa Game One), sa depensa kami nanalo. Ang sama talaga nang offense namin,” matod ni Reyes.
Si Imperial nangulo sa KCS nga may 16 puntos, upat ka rebounds, duha ka assists ug usa ka steal.
Midugang si Mendoza og 15 puntos, 11 niini sa fourth quarter sa dihang ang mi-rally ang Talisay.
Sa pildirong Talisay, si Patrick Cabahug mitali og 12 puntos ug 11 usab ang naumol ni Menina.
Mga puntos:
KCS-Mandaue (67) — Imperial 16, Mendoza 16, Exciminiano 10, Bregondo 7, Sorela 6, Delator 4, Roncal 4, Tamsi 3, Castro 0, Soliva 0, Octobre 0, Nalos 0, Mercader 0, Bongaciso 0. MJAS-Talisay (66) — Cabahug 12, Menina 11, Eguilos 8, Villafranca 8, Gimpayan 7, Hubalde 6, Moralde 3, Mojica 3, Santos 2, Casajeros 2, Acuña 2, Jamon 2, Alvarez 0. Quarterscores: 12-18, 27-32, 47-44, 67-66. (JBM)