SECTIONS
Pampanga
Monday, June 14, 2021
PAMPANGA

Garcia: Pangadi (Prayer)

Kapisik

“Ngeni inya pin, O kekaming Dyos,

pakirandaman mu sana ing pangadi ning Kekang talasuyu,

at ing keyang panigapu para king pakalulu,

at para Keka mu naman,

O Ginu, bustan mung sunlag ya ing lupa Mu

king Kekang santungan, a alang laman.”

Danyel | Dangka 9: Sunis 17 (Daniel 9:17)

“Inya sa’t ipagtapat yu la ring sala yu king balang metung

at ipangadi ing balang metung ba’kayung mipaldan.

Ing pangadi ning matalarung tau mayupaya ya’t ating talab.”

Santyagu | Dangka 5: Sunis 16 (James 5:16)

“Pakamalan, Mangadi ku bang salese ngan ing sabla kekayu

at bang mika-mayap kayung kalusugan, anti mu rin karing kekayung kaladwa.”

Katlung Aklat nang Wan | Dangka 1: Sunis 3 (3 John 1:2)

“Antimurin, ing Diwa sasaupan na katamu king kekatamung keynan.

Uling e ta balu ing ipangadi anti king nung nanu ing dapat,

dapot ing Diwa king sarili Na mamilatan Ya para kekatamu

para karing dalung a asna kalalam para karing amanu.

Ding Romanu | Dangka 8: Sunis 26 (Romans 8:26)

“Ibpa mi ati Ka banwa, misamban Ya sana ing Lagyu Mu,

Datang sana ing kayaryan Mu, matupad ing kaburyan Mu, keti sulip anti banwa.

Ing kakanan mi king aldo’ldo ibye Mu sana kekami, at patawaran Mu ing sala mi

anti king pamamatawad mi karing mikasala kekami, manga e Mu kami ipaysaul king tuksu

nung e ikabus Mu kami king sablang marok.”

Mateu | Dangka 6: Sunis 9-13 (Matthew 6:9-13)

Ing pangadi o pamangadi metung yang maulagang pamaglapit ning tau king Apung Ginu nung nu kapamilatan niti akakasabi ne Ya at makapasyag ya ing minuna king tawli dikil karing panamdaman nang tula o kasakitan, pamanampang at pamanigapu, pamipasalamat at pamamalikid king nanu mang saup a pigkalub ning mangadi manibat king pipangadyan nang Miglalang.

Metung ya iting pamaglapit anting alang upaya, alang akarapat at alang-ala nanu man nung e ing katapatan ning pilubluban uling king arapan ning Apung Ginu—lubas tamu ngan ninu man itamu. Pante-pante tamu ngan king arapan Na.

Makanyan man, ing pamiyaliwa ya pin ing kapakumbaban ning manigapung mangadi anting bingut a alang male, alang sikanan, alang upaya, alang aypagmaragul nanu man. E naman balu nung nanu ing sukat ipangadi at nung makananu ing makatud a pamangadi.

Ala yang kabalu-balu nung nanu ing makatud. Balu namu mayna ya.

Ala yang balu. Ala yang pibandyan. Ala yang nanu man nung e takut, lungkut, kabalisan, kapigaganakan, kaligaligan, kelang-akarapat. O mekad matula ya mu at bisa ya mung pasalamat. Bisa ya mung kumaul Kaya, manangis king kandungan Na, sumbung at magtapat Kaya.

E ya kawangis ding keraklan a mangadi a lalapit mu king Apung Ginu neng atin lang kaylangan Kaya o para karing mapilan a mangadi mu bang ipagmaragul Kaya ing aysaup da karing aliwa, ing sarili dang kayapan, kalinisan ding pusu at kabanalan da. Sumangid na naman nita bubulalag da karing madla ing pamanyaup da, a ila mayap la, dalise la at banal la king nanu mang paralan a atatalastsasan da ring keraklan.

King kilub ning pisamban i o king lwal naman niti, mekad lalakad lang makasiklod, papatak lwa, at kakabug king salu da bang makilala la anting malugud king Apung Ginu. Papakit da karing sabla ing ila malapit la king Apung Ginu—ing ila banal la.

Ing kutang: Balu de pin kaya at balu da pin kaya ing kaburyan ning Apung Ginu?

Dake Talabaldugan

mipanaplus (pangdiwa) mipanapis, mipanyalat, mipanagkil balat o katawan. English - caressing, fondling, stroking, nuzzling, touching each other. Alimbawa king pamangamit: “Disnan mi lang mipanaplus kupa ding mipalsinta at balu ming ibat lang menangis uling malare la pa mata.”

miparagsa (pangdiwa) mipatomba, mipakera, mipabwal. English - unintentionally or accidentally fell, knocked down, dropped, razed, tumbled, demolished Alimbawa king pamangamit: “Bigla yang miparagsa ing maragul a tau inyang timbuk ne panga ning lakwas malati kesa kaya.”

miparakal (pangdiwa) e sasaryang aparakal. English - unintentionally multiplied or increased the quantity or number of something. Alimbawa king pamangamit: “Mengulugi la ring mamisaling gule keng dalan uling miparakal ing pinupul da dapot e no man megisan mipisali ngan deti.”

miparaklut (pangdiwa) mipadaklut, mipapulut, mipadakma, mipadakap, mipasakmal. English - unintentionally or accidentally grabbed, seized, grasp, snatched, snagged, caught something. Alimbawa king pamangamit: “Miparaklut yang dakal a batu ing bingut uling panagalan ne ning asung mamulang a manginis balang labasnan na.”

miparakma (pangdiwa) mipadakma, mipadaklut, mipadakap, mipasakmal. English - unintentionally or accidentally grabbed, seized, grasp, snatched, snagged, caught something. Alimbawa king pamangamit: “Miparakma yang tambing keng lulutu nang ima nang kalame inya mengapaltus ya gamat ing bingut a saligoso.

SADYANG GAWI DA RENG KAPAMPANGAN

Metung a malagad namu o mekad ala na ya pin ing “Block Rosary” o ing lilibut a pamagrusadyu da ring kabalen karing sibabalen aldo’ldo nung nu do pilipat-lipat mu naman ding larawan ning Nwan a Indung Marya kambe ning GinungYesuKristo. Maralas, metung yang panata iti ning mitatag at alang patad madarapat iti kilub ning pabanwa. Mitutuknang mu iti neng milaganasnan na la ngan ding pibale-bale mitutukan king pamagrusadyu. Katatawalyan mililimbun la ring larawan king mabilug a baranggay nung nu ding memalen susulu la’t makiyagnan mangadi king kekaban ning limbun.

Agyang e da anyaran deng mag-Block Rosary—deng sibabale magadya lang pakawasa o agyang apunan na para karing talapangadi a keraklan kayanakan la. Atin o alang pakawasa o apunan—ding talapangadi magrusadyu la uling ita ing tune dang nasa.

Sana mibalaus pa ing gawing senayan ayni anggang kayari na na ning kaligaligan a darala ning sakit a makayawa at e maging metung namung gawing mekalingwan na mu naman.

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph