Binasi sa Buhat 10:25-26, 34-35, 44-48; Salmo 98; 1 Juan 4:7-10; Juan 15:9-17
Sa tuig 1985, napagawas og “recording” si Dionnie Warwick mahitungod sa panaghigalaay. Ang labing nindot nga linya sa maong huni, kon akoy pasultihon, mao: “Keep smiling, keep shining knowing you can always count on me, for sure. That’s what friends are for. For good times and bad times, I’ll be on your side forever more. That’s what friends are for.”
Magkaanam og saka ang atong panuigon, magkaanam pod og lambo ang atong pag-ila nga ang tinuoray nga higala bahandi nga walay ikapuli. Gani si Jesus mismo miingon sa iyang mga tinun-an: “Gisulti ko kini kaninyo aron ang akong kalipay maanaa kaninyo ug ang inyong kalipay mahingpit.” Unsa may nagpaluyo sa maong mga pulong? “Dili ko na kamo tawgon og mga sulugoon, kay ang sulugoon wala mahibalo unsay gibuhat sa iyang agalon; hinunoa, kamo gitawag ko nga mga higala tungod kay ang tanan nga akong nadungog gikan sa akong Amahan akong gipahibalo kaninyo,” mipadayon si Jesus.
Apan unsa may timailhan nga ang mga sumusunod ni Jesus midawat sa iyang imbitasyon nga sila mahimo niyang mga higala? “Kon tumamon ninyo ang akong mga sugo, magpabilin kamo sa akong gugma, sama nga ako nagtuman sa mga sugo sa akong Amahan ug nagapabilin sa iyang gugma,” sumala pa ni Jesus. Gitawag ni Jesus ang iyang sumusunod nga iyang mga higala apan wala kini magpasabot nga magpatuyang na lang pod sila sa ilang kinabuhi nga walay pagpanumbaling sa Dios. Ang pagtuman sa mga sugo ni Jesus timailhan nga mibalos sila sa iyang gugma ngadto kanila.
Ang maong pagtuman dili alang sa kaayohan ni Jesus kondili sa kaayohan sa mga disipulo ni Jesus. Sa ilang pagpatuo madawat nila ang kinabuhi nga gikan kang Jesus nga gikan usab sa Amahan: “Sama nga nahigugma kanako ang Amahan, ako usab nahigugma kaninyo.” Way kinutoban ug limitasyon ang gugma tali sa Amahan ug sa Anak.
Miawas ang maong Diosnong gugma ug midagayday sa mga Judio ug sa mga pagano. Diha sa Mga Buhat mabasa nato ang panagtagbo ni Pedro ug ni Cornelio nga usa ka opisyal nga Romanhong sundalo. Pagano siya. Wala pa gani bunyagi si Cornelio mikunsad na dayon ang Espiritu Santo ngadto kang Cornelio ug sa iyang banay. Walay utlanan ang gugma ug gahom sa Dios. Gibunyagan sila tungod sa tataw nga kabubut-on sa Dios ngadto sa banay ni Cornelio.
Kinahanglan hinumdoman nato kanunay nga ang dagan sa gugma magsugod ug mag-agad sa Dios. “Ang matuod nga gugma mao kini: dili kita maoy unang nahigugma sa Dios, kondili siya maoy unang nahigugma kanato, ug gipadala niya ang iyang Anak aron pinaagi kaniya mapasaylo ang atong mga sala.” Tinuod gyod ning mga pulonga gikan sa unang sulat ni Juan.
Ang tanang matang sa panaghigalaay nga tinuoray ug malahutayon nagagikan sa Dios. Kon higala kita sa Dios aduna kitay sumbanan ug sukaranan sa pagpakihigala sa ubang tawo. “That’s what friends are for.”
Higala ba nimo ang Dios?