MOGUWA lagi karon nga mas isog si Presidential Spokesman Harry Roque kay sa kang Presidente Rodrigo Roa Duterte. Siya gud ang mag-proxy kang Digong na lang sa debate niini batok kang retired Justice Antonio Carpio.
Abi gyud nako nga isog si Digong kay siya ang nanghagad og debate. Macho kaayo ang dating. Apan dihang gidawat ni Carpio ang hagit, niatras man hinuon ang presidente. Si Roque pa ang niisplekar nga siya na lang moatubang.
Aw, gidawat sab dayon ni Roque ang mando sa presidente. Sipsip man kining maong pagdawat ni Roque sa mando sa Presidente, apan makita nako nga mas isog diay siya kay kang Duterte.
TALAWAN
Moguwa hinuon karon nga talawan diay kining atong Presidente. Siya ang nanghagad. Siya ang nanghagit. Apan moatras diay.
Naglibog gyud ang mga DDS unsaon pagdepensa kang Digong. Siya mismo ang niguba sa branding nga isog nga presidente.
Mao diay nga di siya makaharong kang Presidente Xi Jinping sa China kon maghisgot na kabahin sa West Philippine Sea. Ang talawan mao pay mag-unag hisgot nga ang China makiggubat kon kita mobadlong kanila.
Apan nakita man nato sa kasinatian sa Vietnam, Indonesia, ug Taiwan. Gani, nasinati sab sa usa nato ka patrol sa Coast Guard. Kon suklan lang gyud ang mga Insek, moatras man kini.
Sa akong kahinatian sa pagsukol og mga bully kaniadto, basta dili ka moduko dayon ug magpa-awt, sila man ang moatras. Hinuon naa gyuy risgo nga magkadugo ang ilong. Apan magmatngon na sila.
Wa makahibawo ang Digong nga kining si Carpio, sa panahon nga tinun-an pa, nakaagi diay og suspension kay lider sa frat nga nakigrambol. Di kini mahadlok og presidente nga manghagad og debate.
SWERTRES
Tinuod ba nga walay franchise kining mga tindahan sa Swertres dinhi sa Cebu City? Kay kon wala, mangutana ko nganong gipasagdan kini silang mag-operate sa kapulisan? Ug nganong way gibuhat ang opisina ni Mayor Edgar Labella?
Unsa nato ka informant nagkanayon nga dakong raket karon sa kapulisan sa Syudad sa Sugbo ang mangilkil niining mga Swertres outlets aron dili rondahon. Nahimo nilang gatasan kining giingong illegal nga kalihokan. (DM @anol_cebu)