MIDUAW si Philippine Charity Sweepstakes Office (PCSO) general manager Royina Garma sa Sugbo aron makigtagbo sa mga mayor human siya naalarma sa pagminos og maayo sa kita sa ilang outlets dinhi.
Ang hinayhinay nga nagpatay sa kita sa mga lotto outlet mao ang illegal nga small town lottery outlets nga maorag uhong nga nanurok sa kabarangayan sa Dakbayan sa Sugbo. Human sa paglugak sa quarantine status, hinayhinay nga nanurok ang mga outlet nga gipamutang lang daplin sa mga karsada, labina sa mga interior nga bahin.
Di baya lisod ilhon ang illegal STL outlets. Yano ra ang hinimo-himo nga booths. Kon ilegal kini, nganong wa man pangdakpa sa kapulisan ang mga tawo nga nagbantay ug nagpadagan niini? Nganong huwaton pa man nga moari si Garma aron moreklamo sa problema?
Si Cebu City Mayor Edgardo Labella nimando na sa kapulisan mga duha ka semana ang nakalabay sa paggukod sa ilegal nga sugal, apil na ang ilegal nga STL nga mikatap na sa Dakbayan sa Sugbo. Bitaw, dunay napuhag nga mga 20 ka buok, apan gamay ra kaayo ni kon itandi sa kinatibuk-ang gidaghanon sa illegal STL outlets dinhi.
Sayon ra man rondahon kining mga illegal outlet kay dayag kaayo kining makita sa publiko kay naa ra daplin sa mga dan, maagian sa daghang mga tawo. Apan kahibulongan kay wa man maronda sa mga pulis, nga ang uban mangagi pa. Busa, di usab kalikayan nga magduda ang publiko nga dunay nagdawatan og dakong bahin sa kita. Kana bang nagdawatan og dakong porsyento sa kinatibuk-ang kita kay nagkinto na sila sa illegal drugs nga maoy tumong sa hugtanay nga kampanya sa administrasyon ni Presidente Rodrigo Duterte.
Sa una, dagko ang payola nga nadawat sa pipila ka mga pulis gikan sa dagkong mga durugista, apan sa pagdaug na ni Duterte, anam kining naputol.