Usa ka inahan sa bilanggoan magsaulog karon sa Mother’s Day, Mayo 8, human nasikop sa buy-bust sa ilegal nga druga sa Sitio Lquia, Barangay DAS, dakbayan sa Toledo niadtong Biyernes, Mayo 7, sa alas 5:17 sa hapon.
Si Lara Jyne Nadunza Laboga, 28, dunay kapuyo ug nagpuyo sa nahisgutang lugar, napusasan human sa pipila ka semana nga pagpaniid sa kapulisan sa kalihokan sa inahan.
Si Police Lt. Col. Junnel Caadlawon, hepe sa Toledo Police Station nga nahinabi sa Superbalita Cebu, nagkanayon nga si Laboga, nakuhaan nila og kinsa ka gamayng putos sa shabu, cash nga P510 nga gituohang halin sa ilegal nga drugas, ug ang P500 buy-bust money sa kapulisan.
Ang gidiling druga nitimbang sa 1.05 gramos ug mokabat sa P 7,140 mil base sa Dangerous Drugs Board (DDB) value.
Matod ni Police Lt. Col. Caadlawon, ang dinakpan mirason nga tungod sa kawad-on aron dunay ikapakaon sa iyang mga anak.
Kini niasoy nga mipuli siya sa iyang kapuyo pagpamaligya og ilegal nga druga human kini nadakpan ug nabalhog sa bilanggoan. (GPL)