SUPERBALITA CEBU

Chan: Konseho sa Lapu namolitika; konseho mihimakak sa pasangil

Lapu-Lapu City Mayor Junard ‘Ahong’ Chan. (File photo)

MIPASANGIL si Lapu-Lapu City Mayor Junard ‘Ahong’ Chan sa konseho sa dakbayan nga namolitika human nga dugay nga napasar ang supplemental budget no. 1 nga iyang gipangayo.

Hinuon, niadtong Huwebes, Mayo 7, atol sa regular session sa konseho, naaprobar ang supplemental budget nga gipangayo sa mayor nga P169 milyunes.

Apan alang sa mayor langay ang pag-aprobar niini diin moabot og unom ka semana human kini nila gisumiter sa konseho.

Hapit usab wala kini maaprobahi sa milabayng session sanglit hapit wala ma quorum ang konseho.

Maayo na lang kay adunay konsehal nga miapas og tunga sa session aron ma-quorum.

Kon wala pa kini mahitabo, hayan maabtan na usab og sunod semana ang pag-aprobar sa budget, sumala ni Chan nga molanat na og pito ka semana human kini ilang gisumiter.

Nabalaka usab si Chan nga maapektohan ang konseho sa pagtaliwan sa duha konsehal sa dakbayan nga sila si anhing Marcial Ycong ug Joe Dungog.

Nasayran nga nalakip sa gahin sa supplemental budget nga gipangayo ni Chan sa konseho alang sa birthday gift ug incentive sa senior citizens sugod sa buwan sa Abril.

Nalakip usab sa budget ang padayong coronavirus disease 2019 (Covid-19) response sa dakbayan sama sa suweldo sa contact tracers.

“Karon gani daghan na kaayo tag nadawat nga mga reklamo sa atong mga senior citizen nga wala sila matagai sa ilang birthday gift by April. Di na sala sa mayor because we pass already to the city council, so what’s the reason nga inyo mang pugngan because it will reflect in my leadership nga wa ko kahatag?,” matod ni Chan.

Apan si Konsehal Flaviano ‘Bobit’ Hiyas, ang majority floor leader sa konseho, mipadaplin sa alegasyon ni Chan.

Gihulagway kini niya nga walay kapasikaran sanglit natural ra gayud nga maabtan pa ug pipila ka semana ang pag-aprobar sa iyang gipangayong supplemental budget sanglit moagi paman kini ug proseso.

Gibutyag sa konsehal nga kinahanglan isumiter pa sa buhatan sa mayor sa konseho ang Annual Investment Program AIP sa supplemental budget una kini mapasar nga nahitabo tulo ka semana ang nakalabay.

Human niini giaprobar usab kini nila dayon sa susamang adlaw.

Human niini, gihuwat pa nila ang minutes sa naasoyng pag-aprobar sa AIP sa mosunod mga semana una nila mahimong hingpit kini nga maaprobar sa konseho.

Aduna pa usay gamay nga kwestyon ang naglangkob sa finance commitee kalabot sa budget hinungdan nga kini na defer.

Iya usab gipakagamay ang kabalaka ni Chan nga nakuhaan sila og duha ka sakop sa konseho sanglit sa 12 nila nga sakop sa konseho sa pagkakaron walo na lang ang kinahanglan aron maka-quorum.

Kalabot sa giingong wala unta pagka quorum sa konseho niadtong Mayo 7 nga session diin importante nga mapasar ang supplemental budget nga gipangayo ni Chan, dili na makatubag si Hiyas kalabot sa rason sa iyang mga kauban.

Apan siya sa iyang bahin, mibutyag nga nananghid na daan siya ni Bise Mayor Celsi Sitoy nga dili siya makatambong sa session sanglit aduna siyay hearing sa kasong iyang gilabanan.

Human sa hearing, dali siyang miapas sa session sa pagtuo nga wala sila maka-quorum apan pag-abot niya nahuman na ang session ug naaaprobar na ang supplemental budget gumikan kay na quorum ra usab diay.

“Ang right period to approve is now mao to ang last Thursday so wala gyuy delay. Ngano mamolitika man mi nga kalayo pa sa certificate of candidacy? Di gyud na angay nga among ilangay kay ako mismo ang dili ganahan malangay kay kami sige hilak ana kay naa nay para Covid vaccine ngara nga worth around 105 million (pesos) so ang iya pasangil is unfounded,” pasabot ni Hiyas sa pakighinabi sa Superbalita Cebu. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph