SUPERBALITA CEBU

Wali ni Palma sa kapistahan ni San Jose

Cebu Archbishop Jose Palma. (File photo)

Mapasalamaton, padayong nga pag-ampo, ug mopaambit sa nadawat nga grasya, ang tulo ka puntos nga gipadayag ni Cebu Archbishop Jose Palma sa mga magtutuo atol sa pontifical mass sa kapistahan ni San Jose, patron sa dakbayan sa Mandaue kagahapon, Mayo 8.

Si Palma, sa iyang wali, miingon nga ang mga deboto angay magpasalamaton sa Labawng Makagagahum tungod kay ang patron nga si San Jose mao usab ang patron sa unibersal nga simbahan sama sa giproklamar ni Pope Francis sa ika-150 nga anibersaryo niini gikan Disyembre 8, 2020 hangtod Disyembre 8, 2021.

Sigon niya nga ang mga debotante kinahanglan mosunod ug magdasig sa mga maayong buhat ni San Jose nga amahan ni Jesus.

Bisan sa mga pakigbisog nga giatubang sa ningdangat nga pandemiya, sigon ni Palma nga ang mga debotante magpadayon nga mapasalamaton tungod tungod nahatagan pa og higayon ang Sugbo sa pagsaulog sa 500 years of Christianity (YoC).

Sa ingon man, ang National Shrine of St. Joseph lakip sa triduum sa 500 YoC, diin 100 nga mga bata ang nakadawat bendisyon sa kumpirmasyon.

Mapasalamaton si Palma sa mga deboto ni San Jose sa pagsaulog sa pontifical mass uban kaniya ug gilauman niya nga ang mga deboto magpadayon nga mapasalamaton bisan pa adunay mga hagit sa ilang kinabuhi.

Gawas sa pagkamapasalamaton, sigon ni Palma nga ang mga deboto kinahanglan magpadayon sa ilang tinuohan ug padayon nga mag-ampo kang St. Joseph alang man sa ilang kahimsog, industriya, kultura o edukasyon.

Giingon niya nga gipadala sa Ginoo si San Jose aron mahimong tigbantay sa holy family ug hinaut nga si San Jose mahimong tigbantay sab sa mga deboto.

Gipaambit ni Palma nga ganahan siya sa dibuho ni Kiko Arguello, diin gisung-ay ni San Jose ang bata nga Jesus sa iyang liog.

Nahinumdom si Palma kaniadtong bata pa siya nga kada mupauli sila makaagi sila og sapa.

Sama ni Jesus sa dibuho, sung-ayon sab si Palma sa iyang amahan inig labang nila sa sapa ug makabati siya nga luwas siya kung buhaton kini sa iyang amahan.

Niini, naglaum si Palma nga ang mga deboto magpadayon sa pagtoo ug padayon nga mag-ampo kay San Jose.

Sigon niya nga ipasalig sa mga deboto ni San Jose ang ilang mga problema ug kaguol sa kinabuhi.

Naglaum sab si Palma nga ang mga tawo puy-an ang tema sa 500 YoC nga gifted to give o mopaambit sa mga nadawat nga grasya ngadto sa uban bisan pg makaatubang og hagit sa kinabuhi.

Sa laing bahin, ang mga anak nga parokya sa National Shrine of St. Joseph gihatagan kini og quincentennial commemorative gift nga usa ka gospel book.

Ang gospel book nga gisulat sa Cebuano usa ka regalo sa gugma, kinabuhi ug mga grasya sa daghang katuigan nga gihatag ngadto sa Our Lady of Nativity Parish sa Barangay Canduman, San Roque Parish sa Subangdaku, Sto. Nino Parish sa Paknaan, Archdiocese and Shrine of our Lady of Fatima sa Basak, Holy Family parish sa Maguikay, Christ in Agony Parish sa Gethsamane, ug Christ the King Parish sa Alang-Alang. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph