DAVAO DE ORO -- Bangi sa yuta ang usa sa mga gituohang motibo sa pagpatay sa barangay kagawad didto sa Purok 4, Zone B, Clarin Street, Barangay Poblacion, Compostela alas 6:50 sa buntag, Sabado, Mayo 7, 2021.
Ang biktima si Nelson Suarez Asumbrado, 51, minyo, ug kagawad sa Barangay Ngan sa maong lungsod.
Sa gihimong pakighinabi sa SunStar Superbalita, gibutyag ni Polic Corporal Dennis C. Retiza, imbestigador sa Compostela Municipal Police Station, nga wa pa silay matumbok nga suspek kung si kinsa ang mipatay sa kagawad.
Usa sa mga motibo nga ilang nakita mao ang bangi sa yuta base sa pamahayag nga giluwatan sa pamilya sa biktima.
Kahinumdoman nga ang biktima igo lamang nangape kilid sa kolor puti nga Elf truck nga giparking gawas sa ilang balay sa dihang nahitabo ang pagpamusil kaniya.
Nakahiagom ang biktima og daghang samad pinusilan sa nagkadaiyang bahin sa lawas nga miresulta sa iyang kamatayon.
Samtang ang suspek human sa gihimong pagpamusil nagdaling misibat paingon sa wala masayring direksiyon.
Narekober gikan sa crime scene ang lima ka mga basiyo ug upat ka mga balines sa bala sa gituohang sa kalibre .45 nga pistola.
Patay'ng lawas sa biktima gilamayan na sa ilang balay samtang padayon ang gihimong imbestigasyon sa kapulisan alang sa kasulbaran sa krimen.