ATOL sa Mother’s Day kagahapon, Mayo 9, tulo ka mga sunog ang niulbo sa duha ka mga barangay sa dakbayan sa Sugbo.
Dili mominos 108 ka panimalay ang naapektohan ug dul-an sa P2 milyunes ang banabana nga danyos.
Unang sunog sa alas 6:41 sa buntag, niigo sa Sitio Caimito, Barangay Basak San Nicolas.
Sumala sa kabomberohan, ang sunog didto nagsugod sa panimalay sa usa ka Aurora Malig-on.
Ang mga sakop sa Cebu City Fire Department (CCFD) niisa sa sunog sa 1st alarm, nakontrolar sa alas 7:06 sa buntag ug na-fire out sa alas 7:19 sa buntag.
Sa pasiunang imbestigasyon sa CCFD, ang danyos sa sunog gibanabana nga P700 mil. Walay naangol o nakalas sa maong insidente.
Upat ka panimalay ang naugdaw ug tulo ang partially burned samtang dunay 10 ka pamilya ang naapektuhan.
Gisubay pa sa mga imbestigador ang hinungdan sa sunog.
Ang ikaduhang sunog niigo sa Sitio Seaside Alumnos sa samang barangay sa alas 12:50 sa udto.
Dako ang kadaut sa ikaduhang sunog tungod sa 100 ka mga panimalay ang naabo.
Si FO3 Fulbert Navarro, imbestigador sa CCFD nga nahinabi sa Superbalita, nagkanayon nga ang sunog giisa nila sa second alarm.
Sumala niya didto magsugod ang kayo sa panimalay ni Teodomero Echevarria.
Ang sunog nakontrolar sa ala 1:55 sa hapon ug fire out na sa alas 2:19 sa hapon.
Sumala ni Navarro, mokabat sa P1,200,000 ang danyos sa sunog.
Giangkon niya nga naglisod sila kay gamay kaayo og dalan sa dapit ug sagad sa kabalayan ginama sa light materials nga daling nataptan og kayo.
Naglisod ang fire trucks sa pagsulod sa nasunogan busa ilang gisumpay ang tulo ka hose sa bombero sa wala pa nakapasirit sa tubig.
Gawas niini, nangayo sab sila og abag dayon sa kapulisan human dunay mga kawatan nga nakasulod sa lugar ug ilang gipangguba ang establisemento ug gipangawat ang mga wire sa kuryente.
Dugang ni Navarro atol ning pagsuwat, subayunon pa nila kon unsa ang hinungdan sa sunog.
Si Andressa Echaverri, nga nahinabi sa mga tigbalita, nihimakak nga didto nagsugod ang sunog sa iyang panimalay.
Nasubo siya kay isip usa ka single parent, wala siya magdahom nga maugdaw pag-apil ang ilang panimalay atol pa gyud sa Mother’s day.
Matod pa niini, mag-amping gyud ang mga tagbalay kay init kaayo karong panahona, seguraduhon nga walay nahabilin nga kayo sa kusina, ingon man ang mga suga, ug ubang gamit sa panimalay labi na sa kuryente.
Samtang sa ikatulong sunog nahitabo sa Sunrise Village, Brgy. Poblacion Pardo sa alas 3:47 sa hapon diin usa ka panimalay ang naugdaw.
Ang panimalay gipanag-iya ni Serafin Dicdican.
Si FO3 Emerson Arceo sa CCFD nagkanayon didto sa ikaduhang andana sa usa ka panimalay nagsugod ang sunog nga giisa sa 1st alarm, na-fire out sa alas 4:06 sa hapon. Dugang ni Arceo, ang danyos sa ikatulong gibanabana nga nikabat og P30 mil. /