USA si Cebu Governor Gwendolyn ‘Gwen’ Garcia sa labing praktikal nga lider. Dunay balanseng panglantaw bahin sa kaayohan sa iyang katawhan ug pagpatuyok sa lokal nga ekonomiya.
Daghan seguro ang nakamatikod ning maong mithi ni Gwen hinungdan nga dunay nagduso kaniya sa pagdagan sa nasudnong posisyon. Pwede gani pang presidente kon masabak sa lig-ong partido.
Makadaghan na nga hugot nibarog si Gwen sa awtonomiya sa desisyon, sama ning panahon sa pandemiya. Usa sa nakaimpluwensiya sa pagpaubos sa kwarentina sa modified general community quarantine (MGCQ).
Nag-una si Gwen sa pagmando sa pag-abli sa turismo sa lalawigan alang sa lokal nga turista nga wala nay daghang dokumento nga dad-on apan mosunod gihapon sa minimum health standard.
Karong bag-o, si Gwen hugot nibarog sa iyang executive order (EO) 17 nga nagsaysay nga ipaubos sa swab test ang Overseas Filipino Workers (OFW) ug Returning Overseas Filipino (ROF) sa pag-abot sa Mactan-Cebu International Airport (MCIA).
Samtang naghuwat sa resulta, dad-on una sila sa hotel diin sila naka-book. Kon negatibo, makauli ra dayon kini. Tumong sa gobernador nga di mahasol ug duna kini igong panahon nga makauban sa pamilya. Dakong supak si Gwen sa bag-ong lagda nga giaprubahan sa Inter-Agency Task Force (IATF) nga sugyot sa Department of Health (DOH) nga mopaubos una sa pito ka adlaw nga quarantine ang OFWs ug ROFs sa dili pa kuhaan og swab test.
Bisan negatibo, ang IATF nimando og dugang pito ka adlaw sa kwarentina aron pagkompleto sa 14 ka adlaw nga naandang kwarentina. Praktikal ba kini? Kaluoy sa ubang dapit.
Maayo ang Sugbo nga nakabaton og gobernador nga moinsister sa Section 5 sa Local Government Code nga naghatag og gahom sa local government units (LGUs) sa pagdumala ug pagdesisyon sa iyang lokalidad atol sa emerhensya.