SUPERBALITA CEBU

Barrita: Bike lane sa rota sa BRT

Tikdul-tikdol

HUMAN sa misa, usa ka tawo niduol sa pari. Matod niya, “Salamat kaayo, Dre, sa imong wali.” Tubag sa pari, “Ngano man diay, brod?” Matod sa tawo, “Kuan, dre. Abi man gud nako'g gikawat akong bisikleta. Apan paghisgot nimo'g 'Thou shalt not commit adultery,' nakahinumdom ko diin nako ibilin ang akong bisekleta.”

Usa ka palahubog nga nagbisekleta lang, nagpalit og whisky. Nisantop ni sa iyang huna-huna, “Sus, kon matumba ko sa bisekleta ug mabuak ang botelya, kaanugon sa whisky. Maayo pa'g imnon ko na lang ni.” Tuod pag-abot sa balay, siya nakaingon, “Maayo ra gyud nga akong giinom. Kapito gud ko malamba sa bisekleta.”

Maghisgot kita niining bisekleta tungod sa paghimo'g bike lanes sa kadalanan sa siyudad sa Sugbo, sa mga silingang siyudad ug sa ubang bahin sa Pilipinas. Hinumdumi nga hagip-ot ang atong mga karsada ug kinahanglan nga luwas ang bike lanes.

Gikataho nga butangan og bike lanes ang rota sa Bus Rapid Transit (BRT) sa siyudad sa Sugbo. Paggawas sa maong balita, daghan ang nangutana kon buhi pa ba diay ang BRT project nga nahilom taliwa sa Covid-19 pandemic.

Ang Department of Public Works and Highways (DPWH) niingon nga moabot sa 100 ka kilometros ang gitas-on sa loop, ang bike lanes sa siyudad. Apan madugangan kini og 38 kilometros kay butangan man sab og bike lanes ang rota sa BRT.

Wa na tay update sa BRT project nga nakasinati sa hataas nga kalangan. Wa pa ta kahibawo pilay plete sa BRT. Apan maayo na nga butangan og bike lanes aron kadtong di makaabot sa plete sa BRT, magbisekleta na lang.

Migahin ang gobyerno og P1.3 bilyones ubos sa Bayanihan to Recover as One Act aron paghimo og 522.73 ka kilometro nga bike lane network sa national roads sa atong nasod.

Apan hangtod sa Pebrero 28 ning tuiga, matod pa ni Transportation Assistant Secretary Mark Steven Pastor, 4.3 porsiyento lang sa giproponer nga 338.53 ka kilometro nga bike lanes sa Metro Manila ang nahuman.

Samtang 23.87 porsiyento lang sa giproponer nga 140.69 ka kilometro nga bike lanes sa Metro Cebu ug 10.57 porsiyento sa giproponer nga 43.51 ka kilometro nga bike lanes sa Metro Davao ang natapos.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph