ANG pandemiya hilabihan ka misteryuso alang sa uban. Di na angay ikahibulong kon makadungog ta og estorya sa mga negosyo nga nasira, naundang ug wa na gyud makabalik pa. Duna sab hinuoy daghan ang atong nasayran nga tungod sa pandemiya nakat-on sa pag negosyo kay wala nay laing kapaingnan. Ang sakit kay daghan sab ang wa makalahutay tungod sa kahinay sa gitawag nila nga purchasing power karon sa katawhan.
Sa miaging semana, natugpa ko sa usa ka carenderia sa dalan Magallanes sa dakbayan sa Sugbo. Naatol sab nga nibiya ko sa balay nga wa pa makapamahaw mao nga pagkanaug nako sa dyip, sa carenderia nga gipanag-iya ni Floramae Albios ko nagpahiluna pagtambal sa akong kagutom. Akong nasayran nga ang maong puwesto nga gipahiluna sa usa ka parking atea duol sa dalan Calderon, mao diay ang tindahan og hamburger sa wa pay pandemiya. Human mag- lockdown, nabakante kini ug suwerte nga sa ka daghan sa gustong moabang, si Floramae ang nakapirma og kontrata. Taastaas gyud tuod ang binulan nga abang. Pero tungod sa kanindot sa lokasyon, di gyud kamahayan ang maong puwesto.
Sa pikas nga bahin, kadtong nangumusta sa ilang suki nga siomayan sa dalan P. Lopez sa dakbayan sa Sugbo, nakapaniudto sab ko didto karong bag-o. Sikat kaayo ni nga siomayan alang sa mga tinun-an sa University of San Jose-Recoletos (USJ-R), mga trabahante sa mga establisemento sa palibot ug sa mga mamalitay nga nakasuhito dinhi. Nia ni nahimutang sa property sa usa ka dakong tindahan mao nga hamugaway kaayo ang barog nga kinan-anay dinhi.
Nasira, Marso sa miaging tuig. Nangabli, Marso 17 ning tuiga. Gidumala nila ni Renante Batucan ug Darwin Lape.
Sa akong mga kauban kaniadto sa ABS-CBN Cebu sa dekada 90, ang atong security guard nga si Rufino Cabigas nangumusta ninyong tanan. Pag-abli sa atong studio sa dalan Leon Kilat ug P. del Rosario, siya na ang nagbantay didto. Pagka 1995, niundang siya og nag-drive og taxi. Pagka 2006, ang iyang gidata-datahan nga taxi, naimpas ug karon operator na sab siya og taxi.
Sa katapusan, congratulations kang Denden Tubilla. Akong higala nga garbage collector/loader malipayon kaayo. Iyang misis nga si Fe nanganak ug usa ka himsog nga batang babaye. Si Denden nga taga White Road, Inayawan, Cebu City, gustong magpasalamat ni Philip Julia nga nitunol og mga gamit sa masuso nga gipaagi ning inyong higala.