SUPERBALITA CEBU

Health protocol gihigpitan; ‘Oplan Bulabog’ sa CCPO

HUMAN sa mando ni Presidente Rodrigo Duterte nga ipadayon ang pag-estrikto sa pagpatuman sa minimum health standard sama sa pagdakop sa mga wala mag-face mask ug wala motarong sa pagsul-ob niini, ang kapulisan sa siyudad sa Sugbo mas mipahugot pa sa ilang kampanya niini.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga sukad pa sa milabayng tuig wala sila moluag sa ilang pagpanakop sa wala mosunod sa lagda sa Inter-Agency Task Force (IATF).

Gani, ila pa kining gipalapdan uban ang Task Force Kasaligan ug ubang force multipliers diin kadtong masugatan diha sa kadalanan ug sa mga sudlonong bahin sa kabarangayan, ila gyud nga sitahon ug dakpon kon dili mosunod sa mando.

Ang madakpan iduso kini ngadto sa Prevention, Restoration, Order, Beautification, and Enhancement kun Probe team sa kagamhanan sa siyudad sa Sugbo aron mobayad sa multa nga P500.

Gihimakak niya ang pagduda sa netizens nga gihimong pangwarta sa kapulisan ang pagpanakop sa makalapas sa health protocols sanglit ang multa nga gibayad sa madakpan diretso kana sa panudlanan sa siyudad ug adunay resibo nga ihatag ang taga city hall ug walay mapunta niini sa kapulisan.

Panawagan si Parilla sa publiko nga kon adunay police nga maningil sa multa, isumbong kana sa ilang buhatan ug labing maayo nga adunay ebidensya aron pasakaan kinig kasong kriminal ug administratiba.

Samtang human libkasa ni Cebu City Mayor Edgardo Labella ang liquor ban sugod niadtong Mayo 6, ang Oplan Bulabog sa CCPO misusi usab sa mga imnanan nga motugot na nga mobaliyag ilimnon nga makahubog sa ilang kustomer.

Moabot ngadto sa 174 ka mga establisemento ang ilang gipangsusi kon mituman ba sila sa lagda sa bag-ong gipagawas nga executive order sa mayor.

Nakadakop usab silag 178 ka mga tawo nga nakalapas sa minimum health standard, 142 niini mga hamtong na ug 36 ang mga menor de edad pa.

Daghan usab ang nadakpan sa kalapasan sa curfew nga moabot ngadto sa 135, 36 ang walay face mask, walo ang walay quarantine pass ug unom ang nasakpan nga nag-inom daplin sa karsada. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph