ORMOC City - Malampuson ug mabulukon ang gipahigayon sa dakbayan sa Ormoc nga labing una nga Tabanog Festival 2021.
Ang maong aktibidad gipahigayon sa hawanan sa Eastern Visayas State University (EVSU) Ormoc - Patag Campus nga gisugdan pasado ala 1 sa hapon niadtong Sabado, Mayo 8.
Misaksi sa aktibidad si Mayor Richard Gomez, mga konsehal ug kadagkoan sa Department of Education (DepEd).
Walo ka mga grupo gikan sa Ormoc ang nisalmot sa adult category ug pito ka grupo ang nagtigi sa open category.
Ang open category gikan sa nagkalainlain nga lungsod sa kwatro distrito sa Leyte.
MGA NIDAUG
Sa adult category, nakuha sa Team Payaman ang 3rd place nga dunay premyo nga P5,000; 2nd place ang Team Bantam nga dunay premyo P7,000 ug 1st place ang Mercatz nga dunay premyong P10,000.
Sa open category, nakuha sa Team Lubatan ang 3rd place ug dunay premyo nga P10,000; 2nd place ang Palompon Tabanog Beginners Team nga dunay premyong P15,000 ug nakuha sa Team Jhayvee ang 1st place nga may premyo nga P20,000.
Duna sab P5,000 nga consolation prize sa open category ug P3,000 sa adult category.
PANAHON
Dakong hagit sa mga partisipante ang di maayong dagan sa panahon kay nianang buntag, sige og uwan sa Ormoc ug niundang pipila ka oras sa wala pa sugdi ang kompetisyon.
Bisan og wala nay uwan apan wala kayo’y hangin sa ibabaw hinungdan nga nagtigi ang mga nangapil sa ilang taktika kon unsaon pagpalupad nga dili maibanan og puntos.
IPASIGARBO
Base sa guidelines, ang desinyo sa mga tabanog nga iapil dapat nagpakita sa mga simbolo sa ilang lugar, sama sa Ormoc, diin simbolo ang pinya ug pwede sab ang may kalabutan sa Covid-19.
Kon nagpadayon ang uwan, ipatuman sa komitiba ang ‘No Flying Condition’ policy diin hukman kini base sa desinyo.
HEALTH PROTOCOL
Giseguro sa lokal nga kagamhanan nga tanan nga nangapil nisunod sa health protocols batok sa Covid-19.
Ang mga nangapil gipakuha og medical certificate, gipasul-ob og face mask ug dunay tig-scan sa QR code.
Base sa pagbanabana sa kapulisan, naa sa 300 ka mga tawo nga nisaksi sa aktibidad.
Mapasalamaton si Mayor Gomez sa tanan nga nitabang nga mamahimong malampuson ang kalihokan. (JKDP)