DILI moubos 500 ka boat operators sa nagkalainlaing barangay sa dakbayan sa Lapu-Lapu ug miyembro sa grupo sa divers gikan sa Barangay Maribago, ang nakadawat og financial assistance gikan sa Department of Social Welfare and Development (DSWD) 7 nga gipaluyohan ni Kongresista Paz Radaza niadtong Biyernes, Mayo 7, sa Maribago Covered Court.
Ang mao nga financial assistance usa ka lakang sa buhatan ni Radaza pinaagi sa DSWD-7 aron paghatag og abag ngadto sa boat operators ug divers nga naapektohan ang ilang panginabuhian tungod sa pandemiya.
Nasayran nga ang dakbayan sa Lapu-Lapu usa ka tourism city diin daghan gayod sa mga residente ang nagsalig sa turismo sa dakbayan isip ilang mga panginabuhian.
Midangop sa buhatan sa kongresista ang mao nga grupo sa miaging buwan aron sa pagpangayo og tabang sa ilang kalisod ning nagpadayong nasinating pandemiya.
Nunot niini, iya dayong gidungog ang ilang hangyo hinungdan nga ila nang nadawat ang ilang financial assistance nga tag P1,500.
Mipasalig si Radaza nga ang tabang nga iyang gipaabot pasiuna pa lang sa daghan pa nga tabang nga iyang ihatag ngadto sa mga Oponganon nga hilabihang naapektohan niining pandemiya.
Dugang sa kongresista nga sa tulo ka adlaw nila nga distribusyon sa financial assistance sugod niadtong Mayo 5 hangtod Mayo 7, dul-an 2,000 ka beneficiaries ang nahatagan sa financial assistance.
Una nang nanghatag ang kongresista og financial assistance sa mga barangay sa mainland Olango alang sa manuhugay, boatmen, fishermen ug tour guides. (GCM)