ALCANTARA, Cebu - Mikulit og kasaysayan ang underdogs KCS Computer Specialists-Mandaue City human kini mipakaging sa top seed MJAS Zenith-Talisay Citysa ilang deciding Game Three sa 2021 Chooks-to-Go Pilipinas VisMin Super Cup Visayas Leg, 89-75, Dominggo sa gabii diri sa Alcantara Civic Center.
Sa kadaugan, ang KCS maoy unang regional champion sa bag-ong professional basketball sa nasod.
"First and foremost I did what I can to capture their hearts. All coaches coach the physical and mental. Ako dinagdagan ko nang pangatlo eh. Spiritual. Through that I tried to capture their hearts and hoping that they can play as hard as they can," matod ni KCS headcoach Mike Reyes.
"It was very clear that our defense did well for us, and our offensive concepts. I told the team na huwag na kayong tumawag nang play just run out into your spots and decides unsay naa," dugang ni Reyes.
Dinuslitan sa duha ka sunodsunod nga tres ni Patrick Cabahug ang Talisay nakaposte og nuebe puntos nga labaw, 39-30. Apan ang power play ni Bernie Bregondo ug short jumper ni Shaquille Imperial maoy misira sa unang kwarter, 34-39.
Diha na sa third kwarter nakabuylo og maayo ang Mandaue City sa dihang mipahagsa kini og 18-1 nga rally aron imbarguhon ang labaw, 54-44, 4:09 ang nahabilin.
Ning higayona, gawas nila ni Bregondo, Raffy Octobre ug Red Cachuela, ang maong rally gilamasan usab sa tagsatagsa ka tres nila ni Imperial ug Al Francis Tamsi.
Giinat pa ang bintaha ngadto sa 61-50 human sa 3-point shot ni Ping Exciminiano nga nitukma usab sa pagkapupos sa ikatulong kanto. Si Exciminiano kinsa mitali og 15 puntos, 5 ka rebounds ug tulo ka steals, maoy napiling finals MVP.
Ang bigmen nga si McHole Solera nahimo usab nga problema sa MJAS human kini mangigo sa gawas nga bahin ug mitali kinig 12 puntos.
Nisamot ang kabangis sa KCS sa fourth quarter ug ning higayona, ang flashy-pointguard nga si Geliant Delator mao na usab ang miarangkada aron pangulohan ang walo ka sunodsunod nga puntos.
"Abi nako'g di na ko pabalikon ni coach og pasud kay wa lagi siya ka uyon sa akong depensa. Pero nag-andam lang gihapon ko. Mao to nga sa dihang gipabalik ko, ako na lang gibuhat kutob sa akong mahimo," matod pa Delator.
Ang nakapatidlom og maayo sa paglaom sa MJAS mao ang pagkawagtang ni Shane Menina sa katapusang 5:17 segundos. Si Menina na-ejected sa duwa human niya mapikhi si Delator sa nawong.
Mipabuto og duha ka tres si Solera aron kuliton ang 88-68 nga labaw sa himatyong segundos, samtang hinayhinay nang nagselebrar ang KCS diha sa ilang bench.
Ang KCS nga gipanag-iya ni Ricky Verdida nga nakadawat og P500,000 kortesiya sa Chooks-to-Go maoy morepresentar sa Visayas sa Grand Finals karong Agusto idto sa Tubod, Lanao Del Norte.
"We're underdog, but the discipline of the players and the system of the coach made us win," padayag ni Verdida.
"Kung feelings lang ang hisgutan, walay makapatugbabaw sa sa kalipay nga akong nasinati karon. The lord is really working para sa amoa. Kay kon na-champion pa mi sa Game Two wa ta mi P500,000 nga madawat gikan sa Chooks-to-Go," sagol pangumediya ni Verdida pa.
Kon kahinumdoman, sa Game One niadtong Biyernes, gipakaging sa KCS ang MJAS, 67-66, apan nabawsan kini sa Game Two nianang pagka Sabado, 63-56.
Sa wala pa ang Game 3 nianang pagka Dominggo, gipahibawo sa Chooks-to-Go nga mohatag sila og P500,000 alang sa makampiyon sa Visayas leg.
Ang Talisay nga gipangulohan sa 21 puntos ni Cabahug nakadawat og P100,000.
Mga puntos:
KCS-Mandaue 89 – Exciminiano 15, Tamsi 12, Sorela 12, Imperial 10, Delator 10, Bregondo 8, Mendoza 8, Roncal 4, Soliva 4, Cachuela 2, Bonganciso 2, Octobre 2, Nalos 0, Castro 0.
MJAS-Talisay 75 – Cabahug 21, Gimpayan 12, Menina 9, Villafranca 8, Jamon 7, Mojica 6, Hubalde 4, Acuna 3, Santos 2, Eguilos 2, Casajeros 1, Mabigat 0, Dela Cerna 0. Quarterscores: 16-19, 34-39, 61-50, 89-75. (JBM