Bisan pa man og wala makadawat og suporta gikan sa local government unit (LGU), sa gihapon, naglaraw ang KCS Computer Specialists-Mandaue City nga mohimo og courtesy call ngadto ni Mayor Jonas Cortes.
Kini maoy gibutyag ni Ricky Verdida, ang team-owner sa KCS Computer Specialists sa dihang esklusibong gikahinabi sa Superbalita atol sa victory celebration sa GardenVillage sa Basdiot, Moalboal diin nagpuyo ang tibuok team.
"Sa pagkakaron, we will celebrate, but we will think of it. Well, si Mayor Cortes is also a member of the Eagles Club, unya ako Eagles pud ko, so there is a posibility nga mo-courtesy call ta. After all, this is for all Mandauehanon," ni Verdida pa.
Sa nasayran, si Verdida nakadawat og pasalig sa pagsuporta gikan sa Mandaue City government pinaagi ni Mandaue City vice-mayor Glenn Vercide.
Apan, matod pa, nga nahuman na lang ang usa ka buwan nga torneyo wa gyud sila makadawat og bisan unsang abag gikan sa local government.
Hinuon mapasalamaton si Verdida sa GDSM Marketing nga gipanag-iya ni Renan Agodo gumikan sa tudong suporta sa team.
Gikalipay usab ni Verdida ang paghatag og bonus nga P500,000 sa Chooks-to-Go isip Regional champion sa Pilipinas VisMin Super Cup Visayas leg. (JBM)