SECTIONS
Superbalita Davao
Tuesday, September 21, 2021
SUPERBALITA DAVAO

Roldan: Redemption program sa taklobo

Nota Bene

NIADTONG niaging bulan sa Abril 2021, mokabat og P1.2 bilyon nga "fossilized giant clam shell" o taklobo ang gikumpiska sa awtoridad sa Palawan.

Nakuha sa Philippine Coast Guard ang 200 ka toneladang taklobo sa upat ka suspetsado sa paglapas sa Republic Act 9147, o ang "Wildlife Resources Conservation and Protection Act" ug ang Republic Act 8850, o ang "Philippine Fisheries Code."

Ang naasoy'ng higanteng taklobo nahiapil sa pamilyang "Tridacna gigas" nga gitakda nga "endangered species" o nagkawala na nga mananap sa kalibutan diin nagagikan ang mahal nga perlas. Nabuhi kini sa ilawom sa dagat apan sa pagpanglabay sa minilyon ka katuigan, nahimong nang patag og bungtod ang kanhi dagat nga ilang gipuy-an. Kung wa ko masayop, naa sa ilawon sa dagat kaniadto ang Pilipinas mao nga daghan ang taklobo og lamang dagat.

Sa niaging katuigan, dunay balita nga naa kunoy namalit niini nga pribadong grupo gikan sa P20,000-P200,000 ang matag kilo.

Mora'g buang ang mga tawo nga nagkutkot sa ilang nataran ug umahan aron makatapok og daghan ug madato dayon.

Apan sa pagpanglabay sa panahon, mora sab og bula nga nawala ang balita nga naay mopalit.

Tungod niini, gipasagdan na lang nila ang ilang tinapok nga taklobo. Uban gibalik og lubong, gihimong pasawan sa baboy ug giabono sa lubak nga dalan.

Sa pagkatinuod, naay daghang kagamitan sa industriya ang tipaka sa taklobo.

Dunay pagtuon nga magamit kini sa paggama og porselana, tipa sa piano ug madjong, pangsagol sa kosmetik ug may balita nga gigamit usab kini sa parmasyutikal tungod sa sangkap niini nga minerales ug tambal.

Mao usab kini ang hinungdan nganong naay mopalit ilabi na sa buhi nga taklobo nga maoy gidili sa balaod kay nahurot na kini sa mga mananagat.

Tungod sa daghang pagkompiskasyon og taklobo, niadtong Marso 23, 2021 nagpagawas og Memorandum si Ret. Commodore Eduardo B. Gongona, national director sa Bureau of Fisheries and Aquatic Resources (BFAR) sa tanang lokal nga buhatan niini nga adunay Inventory Team nga gitukod nga mohimo og imbentaryo ug dokumentasyon sa tanang taklobo sa tibuok nasud.

Busa iyang gisugo ang tanang rehiyon nga dili manakop sa mga naghupot niini samtang anaa pa ang pag-imbentaryo ug gidid-an usab ang paghatag og "transport permit" sa taklobo paadto sa laing lugar.

Sa laing bahin, nikaryo sab ang National Museum kay ilang trabaho ang pagprotekta sa mga fossilized giant clams subay sa Republic Act 10066 o ang "National Cultural Heritage Act of 2009" tungod kay cultural heritage kining taklobo sa Pilipinas ug dili lang isyu sa panagat.

Tungod niini anaay gipasiugdahan nga "National Giant Clam Farming and Marine Rehabilitation Program" nga gilangkuban og 10 ka ahensiya sa gobyerno ug "National Redemption Program for Fossilized Giant Clam" nga motabang sa pag-imbentaryo ug naay koordinasyon sa BFAR.

Human sa imbentaryo, paliton kini gikan sa mga tag-iya aron makatabang sab sa panahon sa pandemya.

Busa kadtong anaay tinagoan diha makiglambigit sa Program Secretariat Office sa 3rd Floor, Lion's Club Building, Ecoland, Davao City o mo-text sa 0961-173-2542 (Wilson) ug 0995-915-9489 (Eman).


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph