KIDAPAWAN CITY -- Nanawagan karon og hinabang ang mga pamilya nga gikuso-kuso sa dakong buhawi sa usa ka barangay sa Midsayap, North Cotabato niadtong Biyernes.
Sumala kang Rose Jabido nga nagpuyo sa Barangay Upper Glad 2, Midsayap nga wala siya makadawat og tabang gikan sa lokal nga panggamhanan o sa barangay.
Naguba ang balay ni Jabido atol nga miigo ang buhawi nga natumbahan sa dakong punoan sa mangga.
Kahinumdoman nga mibundak ang makusog nga ulan sa lungsod ug sa Aleosan nga gisundan sa pagkuso-kuso sa naghaguros nga hangin o buhawi.
Daghan nga mga kabalayan, pananum, tulunghaan, simbahan ug mga estraktura sa kagamhanan ang gilangkat sa buhawi.
Nawala sab ang suplay sa kuryente sa duha ka lungsod gumikan sa nangatumba ang poste sa Cotabato Electric Cooperative (Cotelco-PPalma).
Hangtud sa pagsuwat ning balita, daghan nga mga barangay sa Aleosan ug Midsayap ang walay suplay sa kuryente o suga nga dagitabnon.
Naningkamot ang mga personahe sa Cotelco-PPalma nga mabalik ang suplay sa kuryente sa nahisgutang mga dapit. (Edgar E. Fuerzas)