Bisan wala makadawat og suporta gikan sa local government unit (LGU), naglaraw gihapon ang KCS Computer Specialists-Mandaue City nga mag-courtesy call ngadto ni Mandaue City Mayor Jonas Cortes.
Kini maoy gibutyag ni Ricky Verdida, ang team owner sa KCS Computer Specialists nga maoy ningsakmit sa kampyunato sa Chooks-To-Go Pilipinas VisMin Super Cup Visayas leg niadtong Dominggo, Mayo 9, 2021, sa lungsod sa Alcantara, Cebu.
“Sa pagkakaron, we will celebrate but we will think of it. Well, si Mayor Cortes is also a member of the Eagles Club unya ako Eagles pud ko, so there is a posibility nga mo-courtesy call ta. After all, this is for all Mandauehanons,” asoy ni Verdida sa dihang ekslusibong gikahinabi sa Superbalita atol sa victory celebration sa GardenVillage sa Basdiot, Moalboal diin nagpuyo ang tibuok team.
Si Verdida nakadawat og pasalig nga suportahan sa Mandaue City Government pinaagi ni Vice Mayor Glenn Bercede.
Apan, matod pa, nahuman na lang ang usa ka buwan nga torneyo, wala gyud sila makadawat og bisan unsang abag gikan sa local government.
Hinuon mapasalamaton si Verdida sa GDSM Marketing nga gipanag-iya ni Renan Agodo gumikan sa tudong suporta niini ngadto sa team.
Gikalipay usab ni Verdida ang gihatagan sila sa Chooks-To-Go og bonus nga P500,000 isip regional champions sa bag-ong torneyo.
Ang Computer Specialists ningmakmak sa MJAS Zenith-Talisay City Aquastars, 89-75, sa deciding Game 3 sa Visayas leg finals aron pag-abante sa Grand Finals. (JBM)