ALCANTARA, Cebu--Mikulit og kasaysayan ang underdogs KCS Computer Specialists-Mandaue City human kini mipakaging sa top seed MJAS Zenith-Talisay City sa deciding Game Three sa 2021 Chooks-to-Go Pilipinas VisMin Super Cup Visayas Leg, 89-75, niadtong Dominggo sa gabii, Mayo 9, 2021, sa Alcantara Civic Center.
Sa kadaugan, ang Computer Specialists mao ang nahimong labing unang regional champion sa bag-ong professional basketball sa nasod.
“First and foremost I did what I can to capture their hearts. All coaches coach the physical and mental. Ako dinagdagan ko nang pangatlo eh. Spiritual. Through that I tried to capture their hearts and hoping that they can play as hard as they can,” matod ni KCS headcoach Mike Reyes.
“It was very clear that our defense did well for us and our offensive concepts. I told the team na huwag na kayong tumawag nang play just run out into your spots.”
Dinuslitan sa duha ka sunodsunod nga tres ni Patrick Cabahug, ang Aquastars nakaposte og siyam ka mga puntos nga labaw, 39-30.
Apan ang power play ni Bernie Bregondo ug short jumper ni Shaquille Imperial maoy misira sa unang kwarter, 34-39.
Pagsugod sa 2nd half, nakabuylo na og maayo ang Computer Specialists ug adunay higayon nga mirehistro sila og 18-1 nga rally aron imbarguhon ang labaw, 54-44, sa nahabiling 4:09 ka mga minutos sa 3rd quarter.
Ang dakong rally sa Computer Specialists gipangulohan nila ni Bregondo, Raffy Octobre ug Red Cachuela inabagan nila ni Imperial ug Al Francis Tamsi.
Ang three-point shot ni Ping Exciminiano maoy nag-inat sa labaw sa Computer Specialists, 61-50, paghuman sa 3rd quarter.
Si Exciminiano, kinsa mitali og 15 puntos, lima ka rebounds ug tulo ka steals alang sa Computer Specialists, maoy napiling finals MVP.
Nagpadayon ang kabangis sa Computer Specialists sa 4th quarter ug ning higayuna, sila na sab si McHole Solera ug ang flashy-pointguard nga si Geliant Delator ang miarangkada.
“Abi nako’g di na ko pabalikon ni coach og pasud kay wa lagi siya ka uyon sa akong depensa. Pero nag-andam lang gihapon ko. Mao to nga sa dihang gipabalik ko, ako na lang gibuhat kutob sa akong mahimo,” matod pa ni Delator.
Ang nakapatidlom og maayo sa paglaom sa Aquastars mao ang pagkawagtang ni Shane Menina sa katapusang 5:17 ka mga minutos. Si Menina na-ejected sa duwa human niya mapikhi si Delator sa nawong.
Ang Computer Specialists, nga gipanag-iya ni Ricky Verdida, nakadawat og ganti nga P500,000 kortesiya sa Chooks-to-Go isip kampyon sa Visayas leg.
Ang Computer Specialists mao ang morepresentar sa Visayas sa Grand Finals karong Agusto 2021 nga ipahigayon sa Tubod, Lanao Del Norte.
“We’re underdogs but the discipline of the players and the system of the coach made us win,” padayag ni Verdida. “Kung feelings lang ang hisgutan, wala’y makapatigbabaw sa kalipay nga akong nasinati karon. The lord is really working para sa amoa. Kay kon na-champion pa mi sa Game Two wa ta mi P500,000 nga madawat gikan sa Chooks-to-Go,” sagol pangumediya ni Verdida pa.
Ang Computer Specialists ningdaog sa Game One, 67-66, apan ningbawos ang Aquastars sa Game Two, 63-56, aron pagpugos og deciding Game Three.
Sa wala pa ang Game Three, gipahibawo sa Chooks-to-Go nga mohatag sila og P500,000 alang sa makampyon sa Visayas leg ug P100,000 alang sa runner-up.
Mga puntos:
KCS-Mandaue (89) – Exciminiano 15, Tamsi 12, Sorela 12, Imperial 10, Delator 10, Bregondo 8, Mendoza 8, Roncal 4, Soliva 4, Cachuela 2, Bonganciso 2, Octobre 2, Nalos 0, Castro 0.
MJAS-Talisay (75) – Cabahug 21, Gimpayan 12, Menina 9, Villafranca 8, Jamon 7, Mojica 6, Hubalde 4, Acuna 3, Santos 2, Eguilos 2, Casajeros 1, Mabigat 0, Dela Cerna 0. Quarterscores: 16-19, 34-39, 61-50, 89-75.