BITAW, kinahanglang motabang ang pribadong sektor sa pagpalit og mga bakuna aron mas sayo kitang makalingkawas niining Covid-19 pandemic. Kon mag-atang lang kita og supply sa kagamhanan, ambot kon unsa pang tuiga kita maka-recover.
Nakauyon ko niining mga pamahayag ni Gilbert Teodoro, kalihim sa Department of National Defense (DND) dihang presidente pa si Gloria Macapagal-Arroyo. Gani, siya ang kandidato ni GMA nga gikaatbang kang Noynoy Aquino.
Samtang si Arroyo kaalyado karon ni Presidente Rodrigo Duterte, si Teodoro niduso karon niining maong awhag alang sa pribadong sektor nga motabang.
Ambot, alang kanako, nagkadaghan na man ang nisukwahi sa nasudnong kagamhanan tungod sa luya ug nagmika nga pagpalit og mga bakuna gikan sa mga manufacturers.
Bisan pa man, nagkanayon si Teodoro nga ang kagamhanan karon nagkinahanglan og tabang. Dili karon panahon sa mga politikanhong panagbangi.
Matod pa, ang katawhan kinahanglang maghunahuna unsaon pagtabang sa kagamhanan. Ang pundo sa katawhan dunay limitasyon.
Nabalaka lang ko sa Sugbo. Naa kitay Syudad sa Sugbo nga wala magkasinabot ang mga lider. Kulang kaayo ang atong budget nga gigahin kon pananglit mosugot ang nasudnong kagamhanan nga makapalit og direkta. Wa pa sab gyud makasugod sa pagkontak ang atong mga opisyal.
Naa kitay Kapitolyo nga dili priority ang pagbakuna. Di ko makasabot sa logic sa Kapitolyo niini.
Samtang nagsigi ang propaganda kabahin sa vaccination, apan walay igong supply nga nangabot gikan sa kaulohan. Ambot kon unsaon sa Opav pagtuman kining ilang saad nga mahuman ang pagbakuna sa igong kadaghanon alang sa herd immunity nga ang nasudnong kagamhanan nagsalig man lang sa mga donasyon.
Basta di lang mag-una sa ilang mabulsa ang mga opisyal, uyon ko niining giingon ni Teodoro nga makapalit ang kagamhanan pinaagi sa foreign loans.
Matod ni Teodoro, ang mga nasud makakuha na og mga foreign loans alang sa pagpalit og mga bakuna. Ingon niya, sa World War II, ang Estados Unidos dunay war fund nga ubos ang interes ngadto sa pribadong sektor.
Sa Asian financial crisis, ang mga South Korean nitabang sa ilang kagamhanan, lakip sa pagbaligya og gubaon nga mga alahas aron lang ma-stabilize ilang currency. Manghinaot ko nga ang pribadong sektor molihok na karon. (DM @anol_cebu)