USA ka makabungog nga pahalipay ug pasidungog alang sa mga inahan, Happy Mother’s Day! Dunay storya nga ang pinakalisud nga trabaho sa tibuok kalibutan dili doctor, dili abogado, dili enhenyero ug uban pa nga profession mao ang trabaho sa usa ka inahan tungod kay nakasalalay sa iyang mga kamot ang kinabuhi sa iyang pamilya.
Kaniadto kon dunay dokumento nga suwatan unya dunay pangutana unsay profession sa inahan, ang isuwat kay “housewife” kon ang inahan walay trabaho o wala ka makahoman og eskuyla aron dawaton og balik ang porma.
Dunay mga bugalbugalon nga moingon “housewife ra na siya” sa usa ka asawa nga way trabaho o walay nakab-ot nga profession. Apan ang wala masabti kaniadto sa kadaghanan nga ang usa ka inahan o housewife, nga sa karon nga panultion mao diay ang manager sa panimalay. Dalaygon apan dili sayon ang trabaho sa usa ka inahan o housewife kay iya man ang tanan nga trabaho sa balay.
Matud pa sa Oxford dictionary, ang housewife “usa ka babaye nga ang kinatibuk-an nga trabaho mao ang pag-amoma sa iyang pamilya, pagpadagan sa kalihokan sa panimalay, ug ang mga bulohaton sa balay samtang ang iyang bana tua sa trabaho.” Apan sa karon nga panahon dunay mga kausaban. Ang bana nga way trabaho gitawag sa komedya nga “houseband” samtang ang asawa maoy nagtrabaho.
Apan niadtong Dominggo masulob-on kadtong mga inahan nga ang ilang mga balay nalakip sa sunog sa tulo ka dapit sa dakbayan sa Sugbo. Ang unang sunog nahitabo didto sa Sitio Caimito, Brgy. Basak San Nicolas diin 10 ka balay ang nasunog. Matud sa taho, ang sunog nagsugod sa balay ni Aurora Malig-on.
Ang ikaduhang sunog didto nahitabo sa Sitio Seaside Alumnos, nga sakop gihapon sa Brgy. Basak San Nicolas, nga nagsugod sa balay ni Teodomero Echevarria samtang ang ikatolo nga sunog didto sa Sunrise Village, Poblacion Pardo, dakbayan sa Sugbo, diin ang balay ni Serafin Dicdican gikan-an sa kayo.
Apan bisan pa sunog niadtong Dominggo nga nakapahasubo sa mga inahan nga naapektuhan, daghan gihapon ang mga pamilya ang nagselebrar sa maong okasyon. Ang pamilya nga dunay katigayonan didto nila gipahigayon sa mga resort sa dakbayan sa Lapu-Lapu ang pagsaulog sa Mother’s Day samtang ang uban didto sa public beach.
Ang sa pag-ubos sa takod sa Covid-19 dinhi sa Sugbo tungod sa paningkamot sa atong mga lokal nga kagamhanan ug pagbulig sa katawhan sa pagtoman sa health protocols, ang mga negosyo sama sa beach resort nabuhi og balik bisan kon ang mga parukyano mga taga diri ra sa Sugbo. Apan subo kay dunay mga negosyo nga nanirado na.