MAHUMAN na lang tingali ang termino ni Presidente Rodrigo Duterte, di pa masugdan ang Bus Rapid Transit (BRT) sa Sugbo. Ang Department of Transportation (DOTr) nangayo na gani og extension sa pagkabalido sa loan og laing duha ka mga tuig. Nagpasabot nga nalangay na og maayo ang pagtukod sa BRT.
Kon subayon, ang pagtukod sa BRT sugdan unta niadtong panahon pa ni kanhi Presidente Benigno Aquino III. Bisan si kanhi mayor Tomas Osmeña ug kanhi mayor ug karon Bise Mayor Michael Rama pwerteng nakaduso na ani nga proyekto nga gitumong aron pagsulbad sa nagkagrabeng suliran sa trapiko sa Metro Cebu.
Apan tungod sa mga babag, labina sa mga estrukturang maagian sa BRT, di kini madali ug masayon. Molanat pa kini og taas nga panahon. Gawas tingali kon manglaktod ang kagamhanan sa proseso, maigo sa kagamhanan ang ilang target nga masugdan sa labing dali nga panahon ang proyekto. Makaya kaha nila ang Disyembre nga pasiunang operasyon sa BRT?
Samtang nakatutok ang atensyon sa BRT, duna say proyektong gipatun-an ang Department of Public Works and Highways (DPWH) alang sa pagtukod og mga flyover, nga molagbas usab sa rota sa BRT. Kon maigo sa BRT, matod sa DPWH di na kini nila idayon.
Unya ang kagamhanan naggasto na og P108 milyunes alang sa pagpahigayon og pagtuon sa proyekto. Di kini gamay nga kwarta nga maora lang og ilabay sa proyekto nga sa katapusan, di diay madayon. Dako ang kalagmitan nga di madayon kon maakapekto kini sa BRT.
Wa diay masayod ang DPWH aning rota sa BRT nga hagbay ra man kining gihisgutan ug gipresentar sa mga tigom, apil na sa mga representante sa proyekto? O nangita lang gyud ang kagastuhan sa pundo aron dunay katarungan sa pagpagawas.
Makaduda pa kay nganong patun-an ug gastuhan ang proyektong way kaseguroang mapatuman. Di ba ni para eleksyon?