SUPERBALITA CEBU

3 ka pulis giakusahan nga milugos sa dalaga

Tulo ka mga pulis nga nadestino sa San Fernando Police Station sa Lungsod sa San Fernando, Lalawigan sa Sugbo ang gidis-armahan ug girelibotan sa serbisyo tungod sa reklamo nga nanglugos sa 20 anyos nga babaye.

Sumala sa babaye, gitabangan siya og lugos sulod sa police station niadtong Sabado sa gabii, Mayo 8, 2021.

Nidangop sa Integrity Monitoring and Enforcement Group (IMEG) Visayas Field Unit ang babaye uban sa iyang inahan aron ireklamo ang tulo ka mga pulis sa San Fernando nga giingong nitabang kaniya og lugos dihang nibisita ang babaye sa police station.

Human masayod si Police Regional Office (PRO) 7 Director Police Brigadier General Ronnie Montejo, gipaimbargohan dayon klini sa ilang armas ug giparelibohan.

Ang tulo temporaryong gibalhin sa Cebu Provincial Police Office (CPPO) holding admin unit samtang gipaubos sa imbestigasyon.

Matod ni Montejo, iyang gimandoan si CPPO Director Police Col. Engelbert Soriano nga ipaubos sa camp restriction ang maong mga pulis.

IMBESTIGASYON

Samtang, si Soriano nagkanayon nga nihimo dayon sila og imbestigasyon human madawat ang reklamo.

Sumala ni Soriano, kadudahan ang pamahayag sa babaye batok sa tulo ka mga pulis tungod sa pag-usab-usab sa mga detalye sa hitabo.

Sa imbestigasyon, nasuta nga nireklamo na usab ang babaye batok sa mga pulis sa laing police station nga gilugos usab siya.

Sumala sa saysay sa babaye, mopadulong unta sila sa San Carlos City, Negros Occidental apan nihunong sa San Fernando kay dunay paliton ang iyang ig-agaw nga kauban.

Ug gidala ang iyang kuwarta nga P3,000 ug ang iyang mga butang.

Dihang gisusi niya sa tindahan diin nipalit ang iyang ig-agaw, nahibaw-an niya nga nisakay na kini sa bus ug gibiyaan siya hinungdan nga nidangop sa kapulisan sa lungsod.

PINK ROOM

Gipahiling sa Pink Room sa Vicente Sotto Memorial Medical Center (VSMMC) ang dalaga.

Giklaro ni Montejo nga bisan nag-usab-usab karon ang pamahayag sa babaye, iyang gipaimbestagahan ang mga pulis.

Gipasabot niini nga nasuko siya dihang nadawat ang impormasyon kay inay tabangan, nabiktima na hinuon sa rape.

Apan, sumala niini nga luoy sab sa habig sa mga pulis kon dili tinuod ang pasangil o nagtumotumo lang ang babaye.

Giawhag niya ang mga pulis nga nihimakak sa akusayon nga mopasaka sab og kaso sanglit dili lang ang tulo ka pulis ang madaot, lakip ang imahen sa organisasyon.

Nasayran sa Superbalita Cebu ang babaye unang nangayo og tabang sa Department of Social Welfare and Development (DSWD), kinsa maoy niabag sa pagsumbong ngadto sa PRO 7.

BUSLOT

Ang babaye unang nisulti nga taga San Carlos City apan nasuta sa kapulisan nga kini taga Mananga 1, Barangay Tabunok, Dakbayan sa Talisay.

Dugang kasayuran sa kapulisan nga makadaghan na usab kini nireklamo susama hitabo didto sa Negros, apan giingong gikuha sab siya sa iyang ginikanan.

Si Major Armando Labora, hepe sa Police Station 2 sa Cebu City Police Office (CCPO), nga ang dalaga naa sa ilang kustodiya ug giduaw na kini sa mga ginikanan kagahapon, Mayo 10.

Dugang ni Labora, ilang giduso sa mga ekperto aa VSMMC aron mapahiling sa psychiatrist human nag-usab-usab ang istorya niini bahin sa hitabo.

“Tiningnan namin yung veracity nung reklamo nung babae at napag-alaman nga po namin na ito, although for verification pa po. Mayroon na rin po syang mga station na pinuntahan and she has filed the same complaint. Kami nagtataka kung ano yung basehan nya duon sa sinabi nya na sya ay na rape allegedly nitong tatlong police,” matod ni Soriano.

MOSUMBALIK OG KIHA

Nasayran nga mobawos karon sa pagpasaka og kaso ang tulo ka pulis batok sa babaye lakip na ang inahan niini nga maoy nangusog nga moreklamo.

Matod ni Soriano nga aduna silay gihuptan nga ebidensya nga magmatuod nga ang tulo ka mga pulis nga gipasanginlan naa sila sa gawas niresponde og alarma.

“Kaya po nagdesisyon itong kasama natin mga taohan natin po sa San Fernando na magkaka-counter charge sila.,” dason ni Soriano sa paglimpiyo sa ilang ngalan.

Apan mibahad usab si Montejo nga kung masuta sa imbestigasyon nga tinuod ang pangangkon sa babaye, mag-atubang og kasong kriminal ug administratiba ang tulo ka mga pulis ug mataktak sa serbisyo. (GPL, AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph