TINGUHA ni Davao Occidental Governor Claude Bautista nga idili ang treasure hunting nga kalihukan sa probinsiya aron nga mas maprotektahan pa ang ilang ancestral nga kayutaan.
Sa paghinabi niadtong weekend, gisulti ni Bautista nga kinahanglan ang pag-ban niini human ang taho sa pagpamulawan sa Barangay Kalbay, Jose Abad Santos (JAS) bag-ohay lang.
Matud ni Bautista nga ang pagpamulawan "di maayong ideya" ilabi na nga ang probinsiya istriktong nagmonitor sa mga kaso coronavirus disease 2019 (Covid-19).
"We will not allow other people to come in and conduct such activity. It might harm the people of Davao Occidental," tin-aw niya.
Gisulti ni Bautista nga si Desiderio Palmera, tag-iya sa propedad kon diin himuon ang pagpamulawan, mihangyo sa iyang buhatan og abag alang sa maong kalihukan.
Bisan og nakapresentar ang treasure hunters og permiso nga gilagdaan sa National Museum, giklaro ni Bautista nga ang maong aktibidad di angay nga ipadayon kay mosulod sila og pribadong propedad.
Ang Barangay Kalbay dunay kinatibuk-ang land area nga 1,568 ektarya kon diin ang 10.10 ektarya niini gipanag-iyahan sa pamilyang Palmera.
Samtang gibutyag ni JAS mayor Jason John Joyce niadtong Sabado sa gabii nga ang grupo sa treasure hunters nibiya na sa ilang lungsod.
Pagklaro ni Joyce nga ang iyang unang "concern" bahin sa ilang presensiya mao ang kaluwasan sa mga molupyo kay ang lungsod nagpabilin nga luwas gikan sa Covid-19.
Tug-an ni Joyce nga moabot sa 224 ka guwardiya gikan sa usa ka security agency sa Soccsksargen giharang sa ilang border checkpoint niadtong Mayo 6 sa dihang misulay og sulod sa munisipalidad.
Nangayo og tabang si Bautista sa Philippine National Police ug sa Armed Forces of the Philippines aron pagtan-aw sa maong sitwasiyon sa lugar. (PNA)