WALA pa’y matudlo nga suspek ang kapulisan sa Calinan Police Station sa pagpusil sa babaye nga nagbaktas alas 3:30 sa hapon niadtong Dominggo, Mayo 9, 2021, didto sa Purok 16, Barangay Calinan Proper, Davao City.
Blangko pa ang kapulisan sa Calinan sa matudlong suspek sa mipusil sa babaye nga si Leonora Naraval.
Sumala ni Police Major Jake Goles, ang station commander sa Calinan police, nga gilayong nahagba ang biktima sa kalsada dihang gipusil sa mamumuno nga sakay sa motorsiklo.
Wala pa sab matino sa kapulisan unsa nga matang sa pusil ang gigamit sa pagpamusil kon diin ang biktima nakahiagom og samad pinusilan sa kilid sa lawas.
Ginasubay karon sa Calinan police ang matuod nga anggulo sa hitabo diin ang biktima anaa nagpaalim sud sa balay tambalanan. (Jeepy P. Compio)