Gihatagan na og pagtugot sa Games and Amusement Board (GAB) ang Pilipinas VisMin Super Cup nga makapahigayon sa ilang Mindanao leg.
Ubos sa pagpaluyo sa Chooks-to-Go, ang Mindanao leg, nga langkuban og siyam ka mga teams, gikatakdang sugdan karong Mayo 30, 2021 sa wala pa matino nga dapit.
“The holding of Mindanao leg, which will strictly adhere to the ‘No License, No Play’ policy, is conditioned on the submission of the regulatory requirements, such as health screening, drug testing, and related documents, as well as on continuing adherence to protocols and strict supervision of the games,” matod ni GAB Chairman Baham Mitra.
Ang Pilipinas VisMin Cup nipahigayon sa ilang Visayas leg sa Lungsod sa Alcantara, Cebu sugod sa Abril 2021 ug natapos niadto lang Dominggo, Mayo 10, 2021.
Pipila lang ka adlaw gikan sa pagsugod, gihamok dayon og kontrobersiya ang maong lega tungod sa alegasyon nga dunay game fixing nga nahitabo sa duwa tali sa Siquijor ug Lapu-Lapu City.
Kini maoy rason kon nganong gisuspenso ang Mindanao leg samtang nagpahigayon og imbestigasyon ang GAB ug ang VisMin Cup nga niresulta sa pagka-ban sa team ug players nga nag representar sa Siquijor.
Human sa imbestigasyon, hapsay ug maayo na ang dagan sa usa ka buwan nga torneyo diin gipaubos sa bubble ang tanang teams.
Sulod sa usa ka buwan nga kombati, ang KCS Computer Specialists-Mandaue City mao ang nigawas nga unang regional champion human gipildi niini ang MJAS Zenith-Talisay City Aquastars sa best-of-three finals, 2-1.
Sa Game One, gipatapsingan sa Mandaue ang Talisay, 67-66, pinaagi sa tres ni Shaquille Imperial. Apan sa Game Two mibawos ang Aquastars, 63-57 aron pagtabla sa series, 1-1.
Sa Game Three, sa wala damha, gilubong sa KCS ang inilog nga MJAS, 89-75, aron hingpit nga malangkat ang unang kampyonato sa bag-ong professional basketball league sa nasod.
Niini, ang KCS nga gipanag-iya ni Ricky Verdida, maoy morepresentar sa National Finals batok sa makampiyon sa Mindanao leg.