Di bastabasta ang gihimo ni Lapu-Lapu City Mayor Ahong Chan ang pag-adto sa mga barangay.
Dakong risgo sa panglawas sa mayor ang pagsud sa mga barangay sa siyudad aron pagtubag sa reklamo ug pagtabang sa katawhan.
Risgo tungod kay mibalik og taas ang kaso sa Covid-19. Ug way kulba si Ahong sa pagtabang sa mga tawo.
Lahi ning klase sa pulitiko si Chan kay maoy mangunay sa pagtabang. Samtang ang ubang pulitiko manago ug di makita sa mga tawo kay hadlok magka Covid-19.
Di ba ang mga pulitiko gianggaan sa katawhan nga “sayon duolon apan lisod pangitaon.”
Ang pasabot niana nga lisod maduol ug di makita sa mga tawo nga moadto sa opisina kay suguon ang secretary nga wala ang mayor.
Samtang si Ahong maoy mangunay sa pag-adto sa balay sa mga tawo nga nangayo og tabang. Bisan pa gani wa mangayo og tabang adtuon sa mayor kon mahibaw-an nga dunay tabangunon.
Dihay nadunggan nako nga nag-istoryahanay sud sa bus. Nadunggan nako ang ilang pagdayeg ni Chan samtang ilang gilibak ang ilang mayor sa lungsod nga way natabang sa mga pobre.
Maayo unta nga himuong samin sa mga pulitiko ang mga gipanghimo ni Ahong ngadto sa katawhan.
TUDELA, LTO-7
Nagtinabangay ang opisina ni Tudela Mayor Jojo Solante ug ang buhatan ni Vic Caindec, director sa Land Transportation Office (LTO) 7, sa napahigayon nga libreng Theorical Driving Course (TDC) niadtong Mayo 4-6, 2021.
Ang nakaapil sa TDC ug unya wala pa makalukat og student driving permit (SP) dunay duha ka tuig nga lugway.
Nanawagan si Solante sa nakatambong sa TDC sa pag apply sa LTO ug SP sa kantidad nga P1,018 ang bayranan.
Kini na kantidad barato ikompara kon moagi og mga driving school nga puwerting mahala.
Usa kini sa mga maayong programa nga nahimo ni Solante sa katawhan sa Tudela sa isla sa Camotes, Sugbo.
Email: efrenlonzon71@gmail.com / Text:09235562777