Dili bastabasta ang serbisyo sa usa ka pulis. Kaluha sa ilang trabaho mao ang risgo kanunay sa kinabuhi. Sila ang tigpahiluna (dili tigbantay) sa kahapsay ug kalinaw sa komunidad. Nanalipod sa integridad sa katawhan nga magpuyo sa luwas nga katilingban.
Kini ang hinungdan nga ang mga aplikante sa pagka pulis gihashasan pag-ayo, gibansay ug giedukar sa balaud lakip sa pag-umol sa saktong pamatasan isip alagad sa publiko.
Daghang maayong pulis apan dunay pipila nga salbahis ug nag-abuso sa gahom. Subo nga pamalandungon nga ang naulahi maoy nakaduhig sa kinatibuk-ang imahen sa organisasyon.
Samtang, dunay uban nga pulis nga biktima usab sa pagyagayaga, pagdaut ug pagmaniobra sa uban nga dunay kaugalingong interes, sama sa pipila ka pulitiko.
Karong bag-o, dunay tulo ka pulis sa police station sa Lungsod sa San Fernando, Cebu nga giakusahan sa usa ka 20 anyos nga babaye nga nilugos kaniya niadtong Mayo 8, 2021. Dili tiaw nga akusasyon human ang krimen nahitabo mismo sud sa presinto? Dakong kaso kini sa usa ka alagad ug tigpatuman sa balaud.
Dihadiha gidis-armahan ug girelibohan sa pwesto ug temporaryo gipaubos sa camp restriction samtang nagdagan ang imbestigasyon. Apan sa pikas bahin, makaluluoy usab ang tulo ka mga pulis tungod sa kadudahan nga pamahayag sa babaye nga nag-usab-usab ug ang pagpamakak sa pipila ka batakang detalye sama sa iyang gipuy-an.
Unang nisulti kini nga taga Dakbayan sa San Carlos sa Negros Occidental apan nasuta nga lumad nga taga Dakbayan sa Talisay sa Sugbo. Naugkat usab nga nipasaka na samang sa reklamo sa pulis didto sa Negros Occ. Dili ba kadudahan usab? Paabuton na lang ang nato ang resulta sa opisyal nga imbestigasyon.
Busa, mga pulis, magbinuotan gyud mo kanunay.