Retiradong opisyal sa BFAR patay sa ambush

Kanhi pangu sa Bureau of Fisheries and Aquatic Resources (BFAR) sa lungsod sa Carmen, namatay sa ambush alas 7:30 sa gabii sa Lunes, Mayo 10, 2021 sa highway sa Brgy. Dawis Norte, lungsod sa Carmen, amihanang Sugbo.

Si Roberto Poquita Pacatang, 63, minyo, nagpuyo sa nahisgutang lugar patay nang niabot sa tambalanan sa Danao City.

Si Police Staff Sgt. Ever Villacarlos sa Carmen Police Station nga nahinabi sa Superbalita Cebu nagkanayon nga si Pacatang gikan sa iyang fish pen padulong mopauli sakay sa iyang motorsiklo.

Sa pag-abot sa highway, siya gisundan siya sa mga tawo nga sakay sa duha ka mga motorsiklo. Ang usa ka motorsiklo nga way angkas ni-overtake kang Pacatang.

Ang angkas sa motorsiklo nga nagsunod maoy nipusil kang Pacatant maka-upat ka higayon sa iyang buko-buko nga milapos sa pikas nga bahin sa lawas.

Ang mga nakasaksi nga habal-habal drivers nibutyag nga human nahagba si Pacatang, nanaug sa motorsiklo ang gunman ug gi-usban siya sa pagpusil aron segurong mamatay.

Ang wala mailhing killer nisakay pagbalik sa motorsiklo ug misibat paingon sa norte sa Sugbo.

Ang kapulisan nakarekuber sa crime scene sa upat ka kabhang sa bala sa kalibre .45 nga pistola ingon man usa ka slug.

Si Major Felicisimo Aranas, Jr., hepe sa Carmen Police Station nga nahinabi sa Superbalita Cebu, nagkanayon nga gisubay na nila ang giingong dunay gikalalis nga mananagat si Pacatang niadtong miaging semana.

Sumala pa niini nga sa nakuha nila nga impormasyon, dunay mga nanagat sa dapit sa iyang fish pen nga iyang gibadlong. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph