Lalake nga giingong dugay nang wa sa maayong pangisip, niguba sa usa ka rebulto ug nibuak sa usa ka orna sa laing imahen sa Archdiocesan Shrine and Parish of Saint Michael the Archangel sa Brgy. Poblacion, Argao, amihanang Sugbo.
Nasikop ra dayon ang lalake kay dunay mga saksi sa hitabo.
Nabali ang pako sa rebulto ni San Raphael dihang kini gitumba samtang gibuak ang orna nga gisudlan sa imahen sa patron, San Miguel Arkanghel.
Ang kadaut nga nahimo ni Ralph (di tinuod niyang ngan), 40, nadiskobrehan sa kapulisan alas 6:30 sa buntag sa Miyerkules, Mayo 12, 2021 human dunay nakataho nga concerned citizen nga nakakita sa hitabo.
Si Police Staff Sergeant Howard Minopa, desk officer sa Argao Police Station nga nakighinabi sa sa Superbalita Cebu, nibutyag nga si Ralph nailhang “buang.”
“Ilado na ni siya nga buang diri. Unya mura niya siya na depressed og samut human nga namatay ang iyang igsuon kay gipusil. Suod kaayo ni siya sa iyang igsuon gud,” matod ni Minopa.
Si Ralph nasikop sa kapulisan human sa ilang search operation pasado alas 7 sa buntag.
Apan wa magdugay, niabot ang pamilya ni Ralph aron pagdala kaniya sa psychiatric ward sa Vicente Sotto Memorial Medical Center (VSMMC) diin siya patambalan.
Matod ni Minopa nga way kaso nga mapasaka batok kang Ralph kay wa siya sa maayong pangisip dihang iyang gipangguba ang mga butang sa simbahan.