SUPERBALITA CEBU

Supply sa shabu gikan sa Palawan, gisakay og fishing boat padung sa Pasil

(Tampo nga hulagway)

Supply sa illegal drugs sa usa ka suspetsadong high value individual nga nasikop sa buy-bust sa Cebu City Police Office sa Miyerkules sa alas 12:05 sa kaadlawon, Mayo 12, 2021, nagagikan sa lalawigan sa Palawan.

Ang drugas giingong gikarga sa fishing boat nga magdunggoan sa Pasil Fish Market sa Dakbayan sa Sugbo.

Ang nasakmitan sa mga sakop sa City Drug Enforcement Unit og kapin sa 100 gramos sa gituohang shabu giilang si Rhey Mark Padilla-Bughao, taga Kamagong St., Barangay Lahug, Dakbayan sa Sugbo.

Nasikop uban kaniya sa operasyon sa may Sityo San Roque sa samang barangay mao si Ranilo del Mar, taga Barangay Luz, Siyudad sa Sugbo.

Ang 101 gramos dunay Dangerous Drugs Board (DDB) value nga P686,800.

Giangkon ni Bughao nga sa Pasil Fish Port niya kuhaon ang iyang supply sa illegal drugs, matod ni Police Major Jonathan Beethoven Taneo, hepe sa City Drug Enforcement Unit (CDEU).

Uyoan ni Bughao ang iyang contact sa Palawan nga mopahibawo usab kaniya nga dunay i-deliver nga 100 grams nga shabu nga iyang iapod-apod sa mga mamalitay.

“Bale motawag ra na sa iyaha nga kuhaa ning 100 grams. Unya depende order sa mga contacts. Naay mangayo og 5 grams kay inig kadawat niya sa 100 grams, siya maoy mo divide ana, nya iya nana i-move sa nag order,” matod ni Taneo.

Nailhan na nila karon kinsa ang uyoan ni Bughao nga mao na karon ang ilang target sa followup operation.

Una kining higayon nga dunay supply sa illegal drugssa Sugbo nga nagagikan sa Palawan nga gisakay sa fishing boat.

Gihugtan na sa mga awtoridad ang pagbantay sa mga shipment sa Sugbo agi sa mga pantalan ug tugphanan human masakmit ang illegal drugs pinaagi sa courier, mga tig-deliver nga mag trucking gikan pa sa kaulohan, pinaagi sa police operations ug sa Philippine Drug Enforcement Agency (PDEA) 7. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph