KINATIBUK-ANG 161,330 nga bakuna sa Covid-19 nga gilangkbuan og tulo ka mga bag-ong pangalan niabot niadtong Miyerkules sa hapon, Mayo 12.
Mga bakuna gibiyahe ngadto sa Francisco Bangoy International Airport, labing nailhan sab isip Davao International Airport, bandang alas 4 sa hapon pinaagi sa commercial flight.
Base sa paghimay nga gitunol sa Department of Health-Davao Region, pinaagi sa Philippine Information Agency, ang rehiyon makadawat og kinatibuk-ang alokasyon nga 132,000 AstraZeneca vaccines, 80 doses sa Sinovac, ug kinatibuk-ang 29,250 doses sa Pfizer-BioNTech.
Gikanayon ni DOH-Davao information officer Yasuy Avila nga ang 20,000 doses igahin alang sa ikaduhang dose sa Priority Group A1 o ang healthcare workers, samtang ang 56,000 doses alang sa una ug ikaduhang doses sa Priority Group A2 o senior citizens.
Dugang ni Yasuy nga sa 56,000 doses, 21,000 niini igahin alang sa Davao City, 8,000 sa Davao de Oro, 11,000 sa Davao del Norte, 7,000 sa Davao del Sur, 3,000 sa Davao Occidental, 6,000 sa Davao Oriental.
Samtang kini ang unang hugna sa bakunang Pfizer nga gialokar sa nasudnong kagamhanan ngadto sa rehiyon sukad kini gideliber ngadto sa Pilipinas niadtong Lunes sa gabii, Mayo 10, 2021.
Kinatibuk-ang 193,050 doses sa Pfizer nga bakuna sa Covid-19 ang gidonar pinaagi sa Covax Facility.
Ang Covax mao ang global initiative nga nagtumong nga maseguro nga mga kabus nga mga nasud makakuha sa bakuna.
Di sama sa Astrazeneca ug Sinovac, ang Pfizer vaccine, nagkinahanglan og ultra low storage temperature nga -70 degrees Celsius, gipahimutang sa Southern Philippines Medical Center (SPMC).
Sukad Mayo 11, sa kinatibuk-ang 84,692 indibiduwal sa rehiyon ubos sa A1, 64,034 nahatagan na sa unang dose, samtang 20,768 nakadawat sa ilang ikaduhang dose.
Base sa ilang nabag-o nga masterlist, kinatibuk-ang 353, 268 senior citizens (A2), ug 55,125 A3 o persons with comorbidities wala pa malakip sa "preceding categories" nalista na alang sa vaccine rollout. (Ralph Lawrence G. Llemit)