COTABATO CITY -- Surprisa nga mibisita si Presidente Rodrigo Duterte sa Datu Paglas, Maguindanao Province niadtong Martes, Mayo 11.
Nakigpulong ang pangulo sa mga opisyal sa Bangsamoro Autonomous Region in Muslim Mindanao (Barmm), local government units, kapulisan ug militar.
Gisusi ni Duterte ang mga armas nga narekober sa militar sa mga engkuwentro sa mga grupo nga kaaway sa gobyerno sa mga probinsiya sa Maguindanao, North Cotabato, Sultan Kudarat, South Cotabato ug Sarangani.
Panawagan ni Duterte sa mga opisyal sa Barmm nga kontrolahon ang BIFF o molusad sa halapad nga operasyon batok sa mga terorista.
Kauban sa Presidente si Senador Christopher "Bong" Go sa pagbisita sa maong lungsod.
Giseguro sab ni Duterte ang iyang suporta alang sa kalampusan sa Barmm.
Giaghat sa Presidente ang tanan nga ahensiya sa gobyerno nga suportahan ang Barmm nga matuman ang dugay na nilang pangandoy sa usa ka malinawon ug mauswagon nga Mindanao.
Sa wala pa ang pag-abot sa Presidente, una nang nanghatag tabang si Go sa mga vendors ug Ustadz sa Sultan Kudarat, Maguindanao Province.
Gibisita usab ni Go ang Cotabato Sanitarium Hospital sa lungsod sa Sultan Kudarat alang sa pagbukas sa 109th Malasakit Center.
Mayo 12, milibot si Go sa North Cotabato ug Kidapawan City alang sa Malasakit Center ug hinabang sa mga biktima sa nakalabay nga linog. (Edgar E. Fuerzas)