GIKONDENA karon sa grupo sa LGBT+ Davao City Coalition ang gihimong diskriminasyon sa usa ka transgender woman sa usa ka resort didto sa Island Garden City of Samal (Igacos).
Kahinumdoman nga nag-trending ang post sa usa ka transgender woman nga si Shannon Remotigue Gonzaga kay mibati kini og diskriminasyon sa paggamit og shower room sa resort.
"We, the LGBT+ Davao City Coalition strongly, condemn this atrocious discrimination inflicted to the transwoman. This incident against the transwoman runs counter to the ideals and values which the coalition stands for," suma sa pahayag sa grupo.
Gidasig sab nila ang lokal nga gobyerno sa Samal nga mopasar og ordinansa nga moprotektar sa katungod sa tanang "sexes."
"Discrimination of this form has no place in any modern democracy!" dugang pa nila.
Human nagtrending ang yawyaw ni Gonzaga, mitubag na ang nagdumala sa resort ug nagkanayong di nila ma-accommodate ang mga trans sa resort sugod Mayo 12.
Sa pahayag sa nanag-iya nga si Mario Reta, di na sila modawat og mga guests nga trans sanglit wala silay pasilidad alang kanila.
"We inform to the public we cannot accommodate transgender because we have no facility for them to avoid issues of discrimination," matud sa resort.
Sa pinakaulahing report, nahinabi si Reta sa usa ka radio station sa Davao City kagahapon, Mayo 12, ug suma niya, mopasaka siya og kasong libelo batok sa mireklamo nga transgender woman.