Makabenepisyo ang kuponon ni LeBron James ug James Harden sa higayon nga mabalik na ang ilang serbisyo niining naghinapos nga bahin sa regular season sa National Basketball Association.
Ang superstar sa Lakers nga si LeBron gikatakdang moduwa karong adlawa batok sa Houston Rockets aron tabangan ang iyang kuponan nga malikay sa knockout games sa play-in tournament sanglit kon mapilde sila sa Rockets dilikado nga di na sila masulod sa top 6.
Mas haruhay ang sitwasyon sa kanhi 2018 NBA MVP nga si Harden sanglit ang Brooklyn Nets sigurado na nga sulod sa playoffs sanglit sila ang kasamtangang nagkupot sa number 2 spot sa Eastern Conference samtang ang Lakers nagkumpayot sa number 7.
Si Nets coach Steve Nash nihulagway nga game-time decision ang status ni Harden sa ilang duwa karong adlawa batok sa San Antonio Spurs.
Si Harden lima na ka semana nga wala makaduwa gumikan sa iyang hamstring injury apan wala mapornada ang Nets sanglit aduna pay duha ka superstars ang ilang team nga si Kyrie Irving ug Kevin Durant.
Kon makabalik si Harden karong adlawa, posible na usab nga makapalta si Irving gumikan sa pagkaigo sa iyang nawong sa siko ni Nikola Vucevic sa Bulls atol sa ilang duwa kagahapon nga sila nidaog, 115-107.
Si LeBron mahimo na untang makaduwa batok sa New York Knicks human sa kapin usa ka semana dihang subli nha nisakit ang iyang bukongbukong dihang nibalik siya og duwa human siya nakapalta og dul-an duha ka buwan. Apan iyang gipili nga mahatagan og 24 oras nga lugway sa pahuway ang iyang ankle injury para baskog sa ilang sunod nga mga duwa
Grabe ang kaligotgot ni LeBron sa bag-ong format sa NBA gumikan sa play-in tournament human sa 72 game regular season hilabi na nga ang Lakers nameligro nga di makasulod sa top 6. (PAC)