Migallen: Tipik sa kasaysayan

Migallen: Tipik sa kasaysayan

Human sa usa ka buwan ug napulo ka adlaw, nitik-op na gyud ang pagpahigayon sa pinakaunang hut-ong sa bag-ong natukod nga Pilipinas VisMin Super Cup Visayas leg, ang bag-ong professional league sa nasod.

Ug ang usa sa pinakagamayng lungsod nga nahimutang sa habagatang bahin sa Probinsya sa Sugbo nga mao ang Alcantara maoy nahimong sentro sa atraksiyon isip host sa bugtong lega nga nagtikawtikaw taliwala ning nagpadayon nga pandemya.

Kinsay magtuo nga ang Alcantara, usa ka fifth class municipality, nga gilangkuban lang og siyam ka mga barangay kansang population gibanabanang moabot sa 16,000, ang maka-host sa makasaysayon nga kalihukan sa natad sa paugnat sa kusog.

Pito ka mga teams (lakip sa Siquijor) nga gikan sa nagkalainlaing dapit sa Visayas ang nagtigi sa maong kompetisyon. Gihamok man tuod og kontrobersiya sa sayong bahin human mitumaw ang alegasyon sa game fixing sa duwa tali sa Siquijor ug sa Lapu-lapu City apan wa kini makatarog ug makabara sa lega.

Nasilotan ang mga responsable ug human niadto hapsay ug hamugaway na ang pagpadagan sa mga duwa hangtod sa katapusang hut-ong sa kompetisyon.

Kaabag usab ang kasikbit nga lungsod nga mao ang Moalboal tungod kay sila man ang nagsilbing host sa mga teams.

Apan kining tanan dili mahitabo kon dili pa tungod ni Alcantara Mayor Fritz Lastimoso. Sa sinugdanan pa lang sa negusasyon, ang batan-ong mayor way duhaduha nga mipakita sa iyang kaagresibo ug suporta sa lega.

Iyang napanglantawan nga dako usab kini og ikatabang ilabi na sa industriya sa sports tourism ug national exposure sa iyang gamayng lungsod. Dinuyogan sa abag usab ni Governor Gwen Garcia, nisamot ang kadasig sa mayor.

Ug dinhi nakulit na ang kasaysayan. Ang Alcantara maoy unang dapit nga nahimugsoan sa pinakabag-ong professional basketball league sa nasod - butang nga lisod nang papason sa kasaysayan.

Dili sab nako ikahibulong nga sa umaabot nga mga adlaw o katuigan, daghan pa unya mga dagkong kalihukan sa natad sa paugnat sa kusog ang mahitabo sa maong lungsod.

Congratulations Mayor Fritz! Congratulations Alcantara!

* * *

Tungod sa ka apiki sa panahon, ang best-of-three finals tali sa KCS-Computer Specialists ug sa MJAS Zenith-Talisay City Aquastars sa Chooks-to-Go Pilipinas VisMin Super Cup Visayas leg mao ra’y atong linawas nga nakoberan.

Ang KCS mibuntog sa MJAS sa Game One, 67-66. Nabawsan kini sa Game Two, 56-63. Apan sa Game Three gilubong sa Mandaue ang Talisay, 89-75, aron langkaton ang unang titulo sa Pilipinas VisMin Super Cup.

Hamubo ra man tuod ang atong pag-istar apan atong nasinati ang mainiton nga pagabi-abi sa maong dapit, ilabi na gyud ni Boss Rodolfo Borja sa Tubu Master ug Alcantara sports commissioner Rey Canoy. Salamat Boss Dolfax sa accomodation. jun.migallen22@gmail.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph