Daghan na unta ang gustong magpabakuna labi pa sa mga senior citizen. Base kini sa gidaghanon sa mga nagpa-register on line ug sa barangay, ingon man sa linya sa mga tawo sa vaccination sites. Apan ang problema kay nahutdan na usab og mga bakuna ang mga local government unit (LGUs) gumikan kay wala makahatag ang Department of Health (DOH). Hinuon, aduna nay nangabot niadtong miaging semana nga nga Sinovac og AstraZeneca. Kining atong gipanggamit karon ang mga donasyon pa gikan sa China ug sa Covax pinaagi sa World Health Organization (WHO).
Ang pipila ka mga kalamboan sa bakuna mao: gilibkas na sa DOH ug Food and Drugs Administration (FAD) ang temporaryong pagdili sa paggamit sa AstraZeneca gumikan sa isyo sa side effect nga “blood clot.” Puwede na kining ipadayon sa paggamit dinhi sa nasud ug itusok ngadto sa 59 anyos paubos ug mga batan-on. Samtang ang Pfizer ug Moderna nga hinimo sa US puwede na usab nga gamiton alang sa mga batan-on. Wala nay kuyaw.
Ang Pfizer ug AstraZaneca nagkahiusa usab aron palambuon pa og maayo ang ilang mga bakuna nga puwede nang gamiton sa managlahi nga doses. Buot ipasabot nga bisan ang imong first dose Pfizer, puwedeng ang second dose AstraZeneca na. Gi-estudyuhan pa kini og maayo. Laing research nga gihimo sa mga scientists mao nga i-incorporate na ang mga bakuna sa malaria, TB ug influenze ngadto sa Covid-19 vaccine. Mahulog na unya ni nga 4 in 1.
Pero mao lagi na nga bisan mabakunahan na ang usa ka tawo, dili pa kini garantiya nga dili ka na matakbuyan sa Covid-19. Matakbuyan apan dili mograbe. Apan adunay pipila ka mga kaso sa US nga ang mga nabakunahan og kompletong doses, namatay gihapon gumikan sa Covid-19. Pero matod pa sa mga eksperto, talagsa ra kini o isolated ra.
Usa ka 80 anyos nga aduna nay sakit daan nataptan ug namatay gihapon sa Covid-19 sa Nebraska, USA. Samtang ang Los Angeles Times, mitaho nga usa ka psychologist namatay usab human bakunahi mga usa ka buwan na ang nakalabay. So, dili gyud diay garantiya ang bakuna nga dili na mamatay ang tawo sa Covid-19. Mosagop gihapon ta sa mga safety health protocols bisan kon nabakunahan na. (bobbygnalzaro@gmail.com)