Daghan ang wa ganahi nga magpabakuna sa CoronaVac sa Sinovac tungod kay “made in China.” Basta gikan sa China, mangahadlok ang mga tawo tungod sa inadlaw nga mga kasinatian sa mga produkto nga gikan sa mao nga nasod.
Ang wa mahibaw-i sa publiko nga daghan sa mga bakuna sa naandang mga sakit dinhi sa nasod, gama sa China, apil na ang Sinovac.
Gawas sa di maayong pagtan-aw sa publiko sa mga produktong gikan sa China, gisamutan pagpaypay ang kahadlok sa mga tawo sa mga kaatbang sa administrasyon. Daghan ang naghuwat sa laing brands nga gikan sa Amerika ug Europe.
Apan nigawas na karon nga ang bakuna nga CoronaVac mas maayo og performance kay sa trial niini. Sa Indonesia, silingan sa Pilipinas, ilang nasuta nga sa 25,374 ka health workers sa Jakarta nga nabakunahan, 100% kanila naprotektahan gikan sa kamatayon samtang 96 porsyento napanalipdan gikan sa pagka ospital.
Mao usab kini ang nasinati sa usa ka dapit sa Brazil diin kadaghanan sa mga tawo nga nabakunahan sa CoronaVac napanalipdan gikan sa coronavirus disease (Covid-19).
Dinhi sa Sugbo, dunay mga health worker nga una ra unta kaayong nabakunahan nagdumili sa pagpabakuna kay maghuwat sila sa AstraZenica, Moderna ug Pfizer. Mao usab kini ang nahitabo sa ubang senior citizens nga nagdumili sa pagpabakuna.
Nahitabo kini bisan kon ang kadagkuan sa Department of Health (DOH) 7 mismo unang nagpabakuna isip ehemplo nga di kini angay kahadlukan. Wa baya pugsa ang mao nga mga opisyal, ila kadtong kaugalingon nga kabubut-on nga magpabakuna.
Ang bakuna sa China mao ra ba unta ang labing daghan og doses nga nangabot sa nasod. Angay kining pahimudsan sa publiko kon moabot na ang turno sa general public. Kay klaro kaayo ang mga resulta sa pagpamakuna sa ubang mga nasod nga ang CoronaVac epektibo batok sa Sars-CoV-2.